ശ്രീകണ്ഠപുരം: മദ്യപിച്ച് വാഹനമോടിച്ച് ഗുഡ്‌സ് ഓട്ടോയ്ക്ക് ഇടിക്കുകയും ഓട്ടോ അടിച്ച് തകര്‍ക്കുകയും ഡ്രൈവറെ മര്‍ദിക്കുകയും ചെയ്ത പൊലിസുകാരനെ നാട്ടുകാര്‍ പിടികൂടി പൊലിസിലേല്‍പിച്ചു. തിങ്കളാഴ്ച രാത്രിയാണ് കാവുമ്പായി ചുണ്ടപ്പറമ്പ് റോഡില്‍ സംഭവം നടന്നത്. കണ്ണൂര്‍ ക്രൈംബ്രാഞ്ചിലെ സിവില്‍ പൊലിസ് ഓഫിസര്‍ കാവുമ്പായിലെ തെക്കേവീട്ടില്‍ പ്രദീപനെയാണ് ശ്രീകണ്ഠപുരം പൊലിസ് അറസ്റ്റ് ചെയ്തത്. കാവുമ്പായിയില്‍ നിന്ന് മദ്യലഹരിയില്‍ കാറുമായി വന്ന ഇയാള്‍ ഉപ്പിലാക്കണ്ടി ഷഫീഖിന്റെ ഗുഡ്‌സ് ഓട്ടോയില്‍ ഇടിക്കുകയായിരുന്നു.
ഷഫീഖുമായി വാക്കേറ്റത്തിലേര്‍പ്പെട്ട പ്രദീപന്‍ ഓട്ടോ തല്ലിതകര്‍ക്കുകയും ഷഫീഖിനെ മര്‍ദിക്കുകയും ചെയ്തു. ഇതുകണ്ട് ക്ഷുഭിതരായ നാട്ടുകാരുടെ നേര്‍ക്ക് അസഭ്യവര്‍ഷവും ചൊരിഞ്ഞു. തുടര്‍ന്ന് ശ്രീകണ്ഠപുരംഎസ്.ഐ രാധാകൃഷ്ണനും സംഘവും സ്ഥലത്തെത്തി പ്രദീപനെ സ്റ്റേഷനിലേക്ക് കൊണ്ടുപോവുകയായിരുന്നു. ഇയാള്‍ക്കെതിരേ പൊലിസ് കേസെടുത്തിട്ടുണ്ട്.