ചെറുപുഴ: ചെറുപുഴ വൈദ്യുതി സെക്ഷന്‍ പരിധിയില്‍ മുതുവം, മുതുവംപാടി പ്രദേശങ്ങളില്‍ രൂക്ഷമായ വോള്‍ട്ടേജ് ക്ഷാമം. പരീക്ഷക്കാലമായതോടെ വോള്‍ട്ടേജില്ലാത്തത് കുട്ടികളുടെ പഠനത്തെ ബാധിക്കുന്നതായി രക്ഷിതാക്കള്‍ പറയുന്നു. രാത്രിയായാല്‍ ബള്‍ബുകള്‍ക്ക് മിന്നാമിനുങ്ങിന്റെ വെട്ടം മാത്രമേയുള്ളൂ. മോട്ടോര്‍, ഫ്രിഡ്ജ്, മിക്‌സി തുടങ്ങിയവയൊന്നും പ്രവര്‍ത്തിപ്പിക്കാനാവുന്നുമില്ല. മുതുവം ട്രാന്‍സ്‌ഫോര്‍മറിന്റെ പരിധിയിലാണ് പ്രശ്‌നം. സിംഗിള്‍ ഫേസ് കണക്ഷന്‍ ത്രീഫേസ് കണക്ഷന്‍ ആക്കുന്നതിനായി നൂറോളം കുടുംബങ്ങള്‍ ഒപ്പിട്ട നിവേദനം വൈദ്യുതി വകുപ്പിന് കഴിഞ്ഞ മാര്‍ച്ചില്‍ നല്‍കിയിരുന്നെങ്കിലും നടപടി ഉണ്ടായിട്ടില്ല. വോള്‍ട്ടേജ് ക്ഷാമം പരിഹരിച്ചില്ലെങ്കില്‍ വൈദ്യുതി ഓഫിസില്‍ ധര്‍ണയടക്കമുള്ള പ്രക്ഷോഭങ്ങള്‍ ആരംഭിക്കുമെന്ന് ഉപഭോക്താക്കള്‍ പറഞ്ഞു.