കൊണ്ടോട്ടി: കരിപ്പൂരില്‍ നിന്ന് വലിയ വിമാനങ്ങളുടെ സര്‍വിസ് ആരംഭിക്കുന്നതിനായി സമര്‍പ്പിച്ച റിപ്പോര്‍ട്ടില്‍ ഡി.ജി.സി.എ വീണ്ടും വിശദീകരണം തേടി. കഴിഞ്ഞ 22ന് ഡി.ജി.സി.എയ്ക്ക് എയര്‍പോര്‍ട്ട് അതോറിറ്റി സമര്‍പ്പിച്ച റിപ്പോര്‍ട്ടില്‍ വിമാന കമ്പനികള്‍ നല്‍കേണ്ട വിശദാംശങ്ങളെക്കുറിച്ചാണ് വിശദീകരണം തേടിയത്.
ഡി.ജി.സി.എയില്‍ നിന്ന് എയര്‍പോര്‍ട്ട് അതോറിറ്റി ദില്ലി കേന്ദ്ര കാര്യാലയത്തിനാണ് കത്ത് ലഭിച്ചത്. ഇത് കരിപ്പൂരിലേക്ക് കൈമാറും. കരിപ്പൂരില്‍ നിന്ന് നേരത്തെ സര്‍വിസ് നടത്തിയിരുന്ന എമിറേറ്റ്‌സ്, സഊദി എയര്‍ലൈന്‍സ് വിമാന കമ്പനികളുടെ വിശദീകരണമാണ് ഡി.ജി.സി.എ ആവശ്യപ്പെട്ടത്. വിമാന കമ്പനികളില്‍ നിന്ന് വിശദീകരണം വാങ്ങി ഡി.ജി.സി.എക്ക് കൈമാറും. ഇതിന് ശേഷമായിരിക്കും വലിയ വിമാനങ്ങളുടെ സര്‍വിസിനുള്ള അനുമതിയുടെ കാര്യത്തില്‍ തീരുമാനമെടുക്കുക.