പാറശാല: ട്രെയിനില്‍ കടത്തിയ രണ്ടേകാല്‍കിലോ കഞ്ചാവുമായി രണ്ട് പേരെ പാറശാല റെയില്‍വേ പൊലിസ് അറസ്റ്റ് ചെയ്തു.
കൊല്ലം ഈസ്റ്റ് വില്ലേജില്‍ സിറ്റി സെന്റര്‍ നഗര്‍ വടക്കും ഭാഗം ബംഗ്ലാവ് പുരയിടത്തില്‍ കൊമ്പന്‍ റോയി എന്ന റോയി വര്‍ഗ്ഗീസ് (45) , കൊല്ലം ഈസ്റ്റ് വില്ലേജില്‍ കുറവന്‍പാലം വരമ്പില്‍ കൂനന്‍ പ്രദീപ് എന്ന പ്രദീപ് (45) എന്നിവരാണ് പിടിയിലായത്.
കഴിഞ്ഞദിവസം മധുരയില്‍ നിന്നും കൊല്ലത്തേക്ക് കഞ്ചാവ് കടത്തുന്നതിനിടെയാണ് പാറശാല റെയില്‍വേ സ്റ്റേഷനില്‍ വച്ച് ഇവരെ പൊലിസ് അറസ്റ്റ് ചെയ്തത്.
മധുരയില്‍ നിന്നും 20000 രൂപയ്ക്ക് വാങ്ങിയ കാഞ്ചാവ് കൊല്ലം സിറ്റിയിലും പരിസരത്തും കൊണ്ട് പോയി വിറ്റാല്‍ 70000 രൂപ ലഭിക്കുമെന്നും കഴിഞ്ഞ മൂന്ന് വര്‍ഷമായി കച്ചവടം നടത്തുന്നതായും പ്രതികള്‍ പൊലിസിനോട് പറഞ്ഞു.
കൊല്ലം ഈസ്റ്റ് പൊലിസ് സ്റ്റേഷനില്‍ 10 കിലോയുടെ കഞ്ചാവ് കേസിലും കൃഷ്ണകുമാറിനെ കൊല ചെയ്ത കേസിലും പ്രതിയാണ് പിടിയിലായ റോയി.
കൂടാതെ കൊല്ലം എക്‌സൈസിന്റെ നിരവധി കഞ്ചാവ് കേസിലും ഇയാള്‍ പ്രതിയാണ്.റോയിയെ നിരവധി കഞ്ചാവു കേസുകളില്‍ പൊലിസിനും എക്‌സൈസിനും സുപരിചിതനായതിനാല്‍ പ്രദീപിനെ കൂട്ടുപിടിച്ച് കഞ്ചാവ് ഒളിപ്പിച്ചാണ് റോയി കച്ചവടം നടത്തി വരുന്നത്.
പാറശാല റെയില്‍വേ പൊലിസ് സ്റ്റേഷന്‍ എസ്.ഐ അനില്‍കുമാര്‍ , എ.എസ്.ഐ ഷിബുകുമാര്‍ , സണ്ണി , സി.പി.ഒ അജേഷ് എന്നിവരുടെ നേതൃത്വത്തിലാണ് കഞ്ചാവ് പിടികൂടിയത്.
ഇന്നലെ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.