മൂവാറ്റുപുഴ: ഫയര്‍ഫോഴ്‌സിന് അഭിനന്ദന പ്രവാഹം. നഗരമധ്യത്തില്‍ തീപിടുത്തമുണ്ടായ അറിയിപ്പ് ലഭിച്ച സെക്കന്റുകള്‍ക്കകം ഓടിയെത്തി തീയണച്ചതാണ് നഗരമധ്യത്തിലുണ്ടായ തീപിടിത്തത്തിന്റെ വ്യാപ്തി കുറയ്ക്കാനായത്.
തീപിടിത്തത്തില്‍ വക്കീല്‍ ഓഫിസും ഫ്രിഡ്ജ് റിപ്പയറിങ് കടയും പൂര്‍ണ്ണമായും കത്തി നശിച്ചുവെങ്കിലും സമീപത്തെ വ്യാപാര സ്ഥാപനങ്ങളിലേയ്ക്ക് തീപടരാതിരിക്കാന്‍ ഫയര്‍ഫോഴ്‌സിന്റെ സമയോചിതമായ ഇടപെടല്‍ തുണയായി. മൂവാറ്റുപുഴ ഫയര്‍ ഓഫിസര്‍ ജോണ്‍ ജി.പ്ലാക്കല്‍ന്റെ നേതൃത്വത്തില്‍ നാല്‍പ്പതോളം ഫയര്‍ ഫോഴ്‌സ് ഉദ്യോഗസ്ഥര്‍ തീയണയ്ക്കലിന് നേതൃത്വം നല്‍കി.
മൂവാറ്റുപുഴ, കോതമംഗലം ഫയര്‍‌സ്റ്റേഷനുകളിലെ നാല് യൂനിറ്റ് വാഹനങ്ങളില്‍ വെള്ളമെത്തിച്ചാണ് തീയണച്ചത്. മൂവാറ്റുപുഴ സ്റ്റേഷനിലെ ഒരു യൂനിറ്റ് വാഹനം വാളകം കുന്നയ്ക്കാലില്‍ എല്‍ദോസ് പാലപ്പുറത്തിന്റെ പൈനാപ്പിള്‍ തോട്ടത്തിലുണ്ടായ തീയണക്കാനായി പോയിരിക്കുകയായിരുന്നു. ഇവിടെ വൈകിട്ട് 4.30നാണ് തീപിടുത്തമുണ്ടായത്. ഇവിടത്തെ തീയണച്ച് കൊണ്ടിരിക്കുമ്പോഴാണ് 4.40ന് മൂവാറ്റുപുഴയില്‍ തീപിടിത്തമുണ്ടായത്. മൂവാറ്റുപുഴയിലെ ഫയര്‍വാഹനം തീയണച്ച് കൊണ്ടിരിക്കുമ്പോള്‍ തന്നെ കോതമംഗലം ഫയര്‍‌സ്റ്റേഷനിലെ വാഹനവും മൂവാറ്റുപുഴയില്‍ പാഞ്ഞെത്തി തീയണക്കുന്നതിന് നേതൃത്വം നല്‍കി. ഫയര്‍ ഫോഴ്‌സിന്റെ സമയോചിതമായ ഇടപെടല്‍ മൂവാറ്റുപുഴയില്‍ വന്‍ദുരന്തമാണ് ഒഴിവായത്.