കോഴിക്കോട്: മട്ടന്നൂരിലെ യൂത്ത്‌കോണ്‍ഗ്രസ് നേതാവ് ശുഹൈബിന്റെ കൊലപാതകവുമായി ബന്ധപ്പെട്ടുള്ള സി.ബി.ഐ അന്വേഷണം അട്ടിമറിക്കാന്‍ സര്‍ക്കാര്‍ ശ്രമിക്കുന്നതായി പ്രതിപക്ഷനേതാവ് രമേശ് ചെന്നിത്തല. സി.ബി.ഐ അന്വേഷണത്തിനെതിരേ അപ്പീല്‍ പോകാനാണ് സര്‍ക്കാര്‍ നീക്കമെന്നും അദ്ദേഹം പറഞ്ഞു. മുസ്‌ലിംലീഗ് സ്ഥാപകദിനത്തോടനുബന്ധിച്ചു കോഴിക്കോട് ജില്ലാകമ്മിറ്റി സംഘടിപ്പിച്ച സ്ഥാപകദിന സംഗമത്തില്‍ മുഖ്യാതിഥിയായി പ്രസംഗിക്കുകയായിരുന്നു അദ്ദേഹം.
ഒരു രാഷ്ട്രീയ കൊലപാതകകേസില്‍ പോലും സര്‍ക്കാര്‍ അപ്പീല്‍പോയിട്ടില്ല. അതേസമയം അപ്പീല്‍പോകാനുള്ള സര്‍ക്കാരിന്റെ നീക്കം സി.ബി.ഐ അന്വേഷണത്തെ സി.പി.എം ഉന്നതനേതാക്കള്‍ ഭയപ്പെടുന്നുവെന്നതിന്റെ തെളിവാണ്. ശുഹൈബിനെ കൊന്നവരേയും കൊല്ലിച്ചവരേയും നിയമത്തിനു മുന്നില്‍ കൊണ്ടുവരുന്നതുവരെ യു.ഡി.എഫ് രാഷ്ട്രീയമായും നിയമപരമായും പോരാട്ടം തുടരും.
സംസ്ഥാനത്ത് ഇപ്പോള്‍ നടക്കുന്നത് കൊലപാതകം മാത്രമാണ്. സര്‍ക്കാര്‍ അധികാരമേറ്റ് 21 മാസത്തിനുള്ളില്‍ 22 കൊലപാതകങ്ങളാണ് നടന്നത്. പൊലിസ് സംവിധാനം പൂര്‍ണമായും തകര്‍ന്നിരിക്കുകയാണ്. കുറ്റവാളികള്‍ക്കും ഗുണ്ടാസംഘങ്ങള്‍ക്കും ക്വട്ടേഷന്‍ സംഘങ്ങള്‍ക്കും സര്‍ക്കാര്‍ സംരക്ഷണം നല്‍കുകയാണെന്നും അദ്ദേഹം പറഞ്ഞു.