പോര്‍ട് എലിസബത്ത്: ആസ്‌ത്രേലിയക്കെതിരായ രണ്ടാം ക്രിക്കറ്റ് ടെസ്റ്റ് വിജയിച്ചതിന്റെ ആഹ്ലാദം തീരും മുന്‍പ് ദക്ഷിണാഫ്രിക്കയ്ക്ക് നിരാശയും. രണ്ടാം ക്രിക്കറ്റ് ടെസ്റ്റില്‍ ടീമിനെ വിജയിപ്പിക്കുന്നതില്‍ നിര്‍ണായക പങ്ക് വഹിച്ച പേസര്‍ കഗിസോ റബാഡയ്ക്ക് പരമ്പരയില്‍ ശേഷിക്കുന്ന രണ്ട് മത്സരങ്ങളിലും കളിക്കാന്‍ സാധിക്കില്ല.
ഗ്രൗണ്ടില്‍ അപമര്യാദയായി പെരുമാറിയ റബാഡയ്ക്ക് ഐ.സി.സി രണ്ട് മത്സരങ്ങളില്‍ വിലക്കേര്‍പ്പെടുത്തിയതാണ് താരത്തിനും ടീമിനും തിരിച്ചടിയായത്. വിലക്കിനൊപ്പം മാച്ച് ഫീസിന്റെ 50 ശതമാനം പിഴയടക്കാനും ഉത്തരവുണ്ട്.
രണ്ടാം ടെസ്റ്റിന്റെ ആദ്യ ദിനത്തില്‍ ആസ്‌ത്രേലിയന്‍ ക്യാപ്റ്റന്‍ സ്റ്റീവന്‍ സ്മിത്ത് പുറത്തായ സമയത്ത് അദ്ദേഹത്തിന്റെ തോളില്‍ ഉരസി പ്രകോപനം സൃഷ്ടിച്ച റബാഡ ഓസീസ് ഓപണര്‍ ഡേവിഡ് വാര്‍ണറെ അസഭ്യം പറയുകയുമുണ്ടായി. നടപടിക്കെതിരേ റബാഡ അപ്പീല്‍ പോയെങ്കിലും താരത്തിന്റെ വാദം കേട്ട മാച്ച് റഫറി ജെഫ് ക്രോ റബാഡയ്‌ക്കെതിരേ ശിക്ഷ എടുക്കാന്‍ ശുപാര്‍ശ നല്‍കിയതോടെയാണ് താരത്തിന് സസ്‌പെന്‍ഷന്‍ നേരിട്ടത്. അസഭ്യം പറഞ്ഞതിന് ഓസീസ് താരം മിച്ചല്‍ മാര്‍ഷിന് മാച്ച് ഫീയുടെ 20 ശതമാനം പിഴയും ഒരു ഡീമെറിറ്റ് പോയിന്റും ശിക്ഷയുണ്ട്.