കോഴിക്കോട്: എസ്.കെ.എസ്.എസ്.എഫ് സംസ്ഥാന എക്‌സിക്യൂട്ടീവ് ക്യാംപ് 'തിങ്ക് ടാങ്ക് ' ഇന്നും നാളെയും വയനാട് ജില്ലയിലെ വാകേരി ശിഹാബ് തങ്ങള്‍ ഇസ്‌ലാമിക് അക്കാദമിയില്‍ നടക്കും. സംഘടനയുടെ അടുത്ത രണ്ട് വര്‍ഷത്തെ കര്‍മപദ്ധതികള്‍ തയാറാക്കുകയാണ് ക്യാംപ് ലക്ഷ്യമാക്കുന്നത്. സംസ്ഥാന സെക്രട്ടേറിയറ്റ്, ഉപസമിതി ചെയര്‍മാന്‍ - കണ്‍വീനര്‍മാര്‍, ജില്ലാ പ്രസിഡന്റ് - ജനറല്‍ സെക്രട്ടറിമാര്‍ എന്നിവരാണ് രണ്ട് ദിവസത്തെ ക്യാംപില്‍ സംബന്ധിക്കുക.
ശനിയാഴ്ച വൈകിട്ട് 4 മണി മുതല്‍ ഞായറാഴ്ച ഉച്ചക്ക് 2 മണി വരെ നടക്കുന്ന ക്യാംപ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങളുടെ അധ്യക്ഷതയില്‍ സമസ്ത കേന്ദ്ര മുശാവറ അംഗം കെ.ടി. ഹംസ മുസ്‌ലിയാര്‍ ഉദ്ഘാടനം ചെയ്യും. അബ്ദു റസാഖ് ബുസ്താനി, ഇബ്രാഹിം ഫൈസി പേരാല്‍, അഷ്‌റഫ് ഫൈസി പനമരം തുടങ്ങിയവര്‍ വിവിധ സെഷനുകളില്‍ സംബന്ധിക്കും.