തിരുവനന്തപുരം: തിരുവനന്തപുരം സബ്കലക്ടര്‍ ദിവ്യ എസ്. അയ്യര്‍ വര്‍ക്കലയിലെ സര്‍ക്കാര്‍ ഭൂമി സ്വകാര്യ വ്യക്തിക്ക് പതിച്ച് കൊടുത്ത സംഭവത്തില്‍ ഫയലുകള്‍ പരിശോധിക്കാന്‍ ലാന്‍ഡ് റവന്യൂ കമ്മിഷണറോട് ആവശ്യപ്പെട്ടുവെന്നു മന്ത്രി ഇ. ചന്ദ്രശേഖരന്‍.
ഫയല്‍ വിളിച്ചുവരുത്തി പരിശോധിക്കാനും സര്‍ക്കാര്‍ ഭൂമിയായി സംരക്ഷിക്കാനും നിര്‍ദ്ദേശം നല്‍കി. വി.ജോയിയുടെ സബ്മിഷനു മറുപടി നല്‍കുകയായിരുന്നു മന്ത്രി.
രാഷ്ട്രീയ സാമ്പത്തിക താല്‍പര്യങ്ങള്‍ സബ്കലക്ടറുടെ നടപടിക്കു പിന്നിലുണ്ടെന്ന് ജോയി ആരോപിച്ചു. അനധികൃതമായി സ്വകാര്യവ്യക്തി കൈവശം വച്ച 27 സെന്റ് ഭൂസംരക്ഷണ നിയമപ്രകാരം തഹസീല്‍ദാര്‍ ഏറ്റെടുത്ത് സര്‍ക്കാര്‍ബോര്‍ഡ് സ്ഥാപിച്ചിരുന്നു. ഇതിനെതിരേ സ്വകാര്യ വ്യക്തി സര്‍ക്കാരിലും ഹൈക്കോടതിയിലും അപ്പീല്‍ നല്‍കി. അവരുടെ ഭാഗം കൂടി കേട്ട് തീരുമാനമെടുക്കാന്‍ ഹൈക്കോടതി നിര്‍ദ്ദേശിച്ചത് പ്രകാരം സബ് കലക്ടര്‍ തഹസില്‍ദാരുടെ ഉത്തരവ് റദ്ദാക്കി. വാദിയുടെ ഭാഗം മാത്രം കേട്ട് അപേക്ഷ തീര്‍പ്പാക്കിയെന്ന ആക്ഷേപമാണ് ഉയര്‍ന്നതെന്നും മന്ത്രി വ്യക്തമാക്കി.