ന്യൂഡല്‍ഹി: ചെങ്ങന്നൂര്‍ ഉപതെരഞ്ഞെടുപ്പില്‍ കേരളാ കോണ്‍ഗ്രസ് (എം) നേതാവ് കെ.എം മാണിയുടെ പിന്തുണ ഉറപ്പാക്കുന്നത് സംബന്ധിച്ച് സി.പി.എമ്മിന്റെയും സി.പി.ഐയുടെയും കേന്ദ്രനേതൃത്വം ധാരണയിലെത്തി.
ഇന്നലെ വൈകിട്ട് സി.പി.എം കേന്ദ്ര കമ്മിറ്റി ഓഫിസില്‍ നടന്ന ചര്‍ച്ചയില്‍ സി.പി.എം ജന. സെക്രട്ടറി സീതാറാം യെച്ചൂരി, പൊളിറ്റ് ബ്യൂറോ അംഗം എസ്. രാമചന്ദ്രന്‍പിള്ള, സി.പി.ഐ ജന. സെക്രട്ടറി സുധാകര്‍റെഡ്ഡി, സെക്രട്ടറി ഡി. രാജ എന്നിവര്‍ പങ്കെടുത്ത യോഗത്തിലാണ് മാണി വിഷയം ചര്‍ച്ച ചെയ്തത്. ഉപതെരഞ്ഞെടുപ്പ് സംസ്ഥാന സര്‍ക്കാരിനെ സംബന്ധിച്ചിടത്തോളം നിര്‍ണായകമാണെന്ന് യോഗം വിലയിരുത്തി.
കഴിഞ്ഞദിവസം ഡല്‍ഹിയില്‍ നടന്ന സി.പി.എം പൊളിറ്റ് ബ്യൂറോ യോഗത്തില്‍ സംസ്ഥാന ഘടകം ഇക്കാര്യം ഉന്നയിച്ചിരുന്നു.
കേരള കോണ്‍ഗ്രസിന് നിര്‍ണായക സ്വാധീനമുള്ള ചെങ്ങന്നൂര്‍ മണ്ഡലത്തില്‍ അവരുടെ വോട്ട് സ്വന്തമാക്കാനുള്ള ഇടപെടലുണ്ടാകണമെന്നായിരുന്നു സംസ്ഥാന ഘടകത്തിന്റെ ആവശ്യം.
തീരുമാനം സംസ്ഥാനഘടകത്തിനുമേല്‍ അടിച്ചേല്‍പ്പിക്കാനാവില്ലെന്ന നിലപാടാണ് യോഗത്തില്‍ സി.പി.ഐ സ്വീകരിച്ചത്. കേന്ദ്ര നേതൃത്വത്തിലെ ചര്‍ച്ചയിലൂടെ ഇക്കാര്യത്തില്‍ തീരുമാനമുണ്ടാകില്ലെന്നും യോഗം വിലയിരുത്തി.
ഇതോടെ തുടര്‍ചര്‍ച്ച സംസ്ഥാന ഘടകത്തില്‍ നടക്കട്ടെയെന്ന നിലപാടെടുത്ത് യോഗം പിരിയുകയായിരുന്നു.
ഫലത്തില്‍ കേരള കോണ്‍ഗ്രസുമായുള്ള സഹകരണം ഇടതുമുന്നണിയില്‍ വീണ്ടും കീറാമുട്ടിയായി. മാണിയെ ഇടതുമുന്നണിയിലേക്കു കൊണ്ടുവരുന്നതിന് സി.പി.എം ശ്രമിക്കുന്നുണ്ടെങ്കിലും മുന്നണിയിലെ രണ്ടാമത്തെ കക്ഷിയായ സി.പി.ഐ എതിര്‍ക്കുകയാണ്.