കാന്‍ബെറ: 16 വയസ്സിനു താഴെയുള്ളവരുടെ സോഷ്യല്‍ മീഡിയാ ഉപയോഗത്തിന് കടിഞ്ഞാണിടാന്‍ ആസ്‌ത്രേലിയ. കുട്ടികളുടെ മാനസികാരോഗ്യം സംരക്ഷിക്കുന്നതിന്റെ ഭാഗമായി 16 വയസ്സിനു താഴെയുള്ളവര്‍ സാമൂഹ്യ മാധ്യമങ്ങള്‍ ഉപയോഗിക്കുന്നത് തടയുമെന്ന് ആസ്‌ത്രേലിയന്‍ പ്രധാനമന്ത്രി ആന്തണി ആല്‍ബനീസ്  പറഞ്ഞു.

സാമൂഹ്യമാധ്യമങ്ങള്‍ കുട്ടികളെ മോശമായി ബാധിക്കുന്നുണ്ടെന്നും അടുത്ത മാസം ഇതു സംബന്ധിച്ച നിയമം കൊണ്ടുവരുമെന്നും ആല്‍ബനീസ് പ്രതികരിച്ചു.
സാമൂഹ്യ മാധ്യമങ്ങളിലൂടെ തെറ്റായ വിവരങ്ങള്‍ പ്രചരിപ്പിക്കുന്നത് തടയുന്നതിനുള്ള നിയമനിര്‍മ്മാണവും ആസ്‌ത്രേലിയന്‍ സര്‍ക്കാരിന്റെ പരിഗണനയിലുണ്ട്.

അടുത്ത കാലത്തായി പല രാജ്യങ്ങളും സാമൂഹ്യ മാധ്യങ്ങള്‍ക്ക് നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. അതിനു പിന്നാലെയാണ് ആസ്‌ത്രേലിയന്‍ ഗവണ്‍മെന്റിന്റെ നീക്കം.