മനാമ: നിര്‍ദേശിക്കപ്പെട്ട എണ്ണം സ്വദേശികളെ ജോലിക്കെടുക്കാത്ത സ്ഥാപനങ്ങള്‍, വിദേശികളെ ജോലിക്കെടുക്കുകയാണെങ്കില്‍ അത്തരം കമ്പനികളില്‍ നിന്ന് ഉയര്‍ന്ന ലേബര്‍ ഫീസ് ഈടാക്കണമെന്ന നിര്‍ദേശം പാര്‍ലമെന്റ് അംഗീകരിച്ചു. ഇത് അവലോകനത്തിനായി മന്ത്രിസഭക്ക് കൈമാറി. 

ഹനാന്‍ ഫര്‍ദാന്റെ നേതൃത്വത്തില്‍ അഞ്ച് എം.പിമാര്‍ മുന്നോട്ടുവെച്ച ഈ നിര്‍ദേശം പാര്‍ലമെന്റ് ഗൗരവമായി ചര്‍ച്ചചെയ്തു. ബഹ്‌റൈനൈസേഷന്‍ ക്വോട്ട കൈവരിക്കുന്നതില്‍ പരാജയപ്പെട്ട കമ്പനികള്‍ ജോലിക്കായി വിദേശ ജീവനക്കാരെ നിയമിക്കുമ്പോള്‍ ഒരു ജീവനക്കാരന് 2,500 ദീനാര്‍ വരെ എന്ന ക്രമത്തില്‍ ഉയര്‍ന്ന ലേബര്‍ ഫീസ് ഈടാക്കാനാണ് എം.പിമാര്‍ മുന്നോട്ടുവച്ച നിര്‍ദേശം.

ശമ്പളത്തിന്റെ അടിസ്ഥാനത്തില്‍ വ്യത്യസ്ത നിരക്കാണ് ശിപാര്‍ശ ചെയ്യുന്നത്. 200 ദീനാര്‍ വരെ പ്രതിമാസവേതനമുള്ള ഒരു തൊഴിലാളിയെ നിയമിക്കുമ്പോള്‍ സ്ഥാപനം 500 ദീനാര്‍ ലേബര്‍ ഫീസ് നല്‍കണം. 201നും 500നും ഇടയില്‍ ശമ്പളമുള്ളവര്‍ക്ക് 1000 ദീനാര്‍, ശമ്പളം 501 നും 800 നും ഇടയിലായാല്‍ 1,500 ദീനാര്‍. 801 മുതല്‍ 1,200 വരെ ശമ്പളമുള്ളവര്‍ക്ക് 2,000 ദീനാറും, 1,200ല്‍ കൂടുതല്‍ ശമ്പളമുള്ളവര്‍ക്ക് 2,500 ദീനാറുമാണ് ലേബര്‍ ഫീസായി നിര്‍ദേശിച്ചിരിക്കുന്നത്.

കമ്പനികള്‍ രണ്ട് വര്‍ഷത്തിലൊരിക്കല്‍ ലേബര്‍ മാര്‍ക്കറ്റ് റെഗുലേറ്ററി അതോറിറ്റിക്ക് നല്‍കുന്ന തൊഴില്‍ ഫീസിന് പുറമെയായിരിക്കും ഇത്. എന്നാല്‍ ഫീസ് വര്‍ധന വിപണിയില്‍ പ്രതിസന്ധിക്കും, വിലക്കയറ്റത്തിനും കാരണമാകുമെന്ന് ചൂണ്ടിക്കാട്ടി ബഹ്‌റൈന്‍ ചേംബര്‍ ഈ നിര്‍ദേശത്തെ എതിര്‍ത്തിരുന്നു.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

 In a bid to enforce localization requirements, parliament has given its nod to impose higher labor fees on companies failing to meet these obligations, promoting local employment and development.