ചേവായൂര്‍: മെഡിക്കല്‍ കോളജ് ആശുപത്രിയിലെ കക്കൂസ് ടാങ്കിലെ മാലിന്യമുള്‍പ്പെടെ ടാങ്കില്‍ നിന്നു നിറഞ്ഞൊഴുകുന്ന മാലിന്യങ്ങള്‍ റോഡിലൂടെ പരന്നൊഴുകുന്നു. മാസങ്ങളായി ഈ നില തുടര്‍ന്നിട്ടും ബന്ധപ്പെട്ട ആരോഗ്യ വിഭാഗം ഇത് കണ്ടില്ലെന്ന് നടിക്കുകയാണെന്നാണ് നാട്ടുകാര്‍ പരാതിപ്പെടുന്നത്.
മെഡിക്കല്‍ കോളജ് സൂപ്പര്‍ സ്‌പെഷാലിറ്റി ആശുപത്രി പരിസരത്താണ് ഈ ദുരവസ്ഥ. ടാങ്ക് നിറഞ്ഞ് കവിഞ്ഞൊഴുകുന്ന മലിനജലം ആശുപത്രിയുടെ പാര്‍ക്കിങ് ഏരിയയിലെ താഴ്ചയില്‍ തളം കെട്ടി നിന്നാണ് റോഡിലേക്കൊഴുകുന്നത്. റോഡരികിലെ നടപ്പാതയിലൂടെയാണ് മലിനജലം താഴ്ന്ന പ്രദേശത്തേക്ക് ഒഴുകി ജനവാസ കേന്ദ്രത്തിലെത്തുന്നതെന്ന് നാട്ടുകാര്‍ പറയുന്നു. ഇതുമായി ബന്ധപ്പെട്ട് പരാതി അറിയിച്ചിട്ടും നടപടിയെടുക്കില്ലെന്നാണ് നാട്ടുകാരുടെ പരാതി.