കണ്ണൂര്‍: മലബാര്‍ സാംസ്‌കാരിക പൈതൃകോല്‍സവത്തിന്റെ ഉദ്ഘാടനം ഇന്ന് വൈകിട്ട് ആറിന് കണ്ണൂര്‍ ടൗണ്‍ സ്‌ക്വയറില്‍ നിയമസഭാ സ്പീക്കര്‍ പി. ശ്രീരാമകൃഷ്ണന്‍ നിര്‍വഹിക്കും. മന്ത്രി രാമചന്ദ്രന്‍ കടന്നപ്പള്ളി അധ്യക്ഷനാകും. ചരിത്രപൈതൃക പ്രദര്‍ശനോദ്ഘാടനം മന്ത്രി കെ.കെ ശൈലജ നിര്‍വഹിക്കും. പുരാവസ്തു പുരാരേഖാ മ്യൂസിയം വകുപ്പുകള്‍, ഭാരത് ഭവന്റെയും ഫോക്‌ലോര്‍ അക്കാദമിയുടെയും കേരള ഭാഷാ ഇന്‍സ്റ്റിറ്റ്യൂട്ടിന്റെയും സഹകരണത്തോടെയാണ് മാര്‍ച്ച് 26 വരെ പൈതൃകോല്‍സവം സംഘടിപ്പിക്കുന്നത്.
രാവിലെ 9.30ന് തെയ്യം കലയും കാലവും എന്ന വിഷയത്തില്‍ സെമിനാര്‍ ഫോക്‌ലോര്‍ അക്കാദമി ചെയര്‍മാന്‍ സി.ജെ കുട്ടപ്പന്‍ ഉദ്ഘാടനം ചെയ്യും. ഡോ. കെ.എം ഭരതന്‍ വിഷയം അവതരിപ്പിക്കും. വൈകിട്ട് അഞ്ച് മുതല്‍ ആറ് വരെ നാട്ടരങ്ങ്, ഗദ്ദിക, നിണബലി.
ഏഴ് മുതല്‍ 9.30 വരെ വന്ദനഗീതം, സര്‍ഗസുധ, കഥകളി, മെഗാഷോ. നാളെ രാവിലെ 9ന് പഴമയിലെ പുതുമ എന്റെ പെരുമ ചരിത്ര പൈതൃക ബോധന യാത്ര ജനകീയ ചരിത്ര പൈതൃക പ്രശ്‌നോത്തരി. വൈകിട്ട് അഞ്ചു മുതല്‍ നാട്ടരങ്ങ്, മംഗലം കളി, എരുതുകളി, അലാമിക്കളി. തുടര്‍ന്ന് ആദരക്കൂട്ടായ്മ മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്യും. ഇ.പി ജയരാജന്‍ എം.എല്‍.എ അധ്യക്ഷനാകും. സംഗീതനാടക അക്കാദമി ചെയര്‍പേഴ്‌സണ്‍ കെ.പി.എ.സി ലളിത വിശിഷ്ടാതിഥിയാകും. തുടര്‍ന്ന് വിവിധ കലാപരിപാടികള്‍.
നാളെ കമ്മ്യൂനിറ്റി ആര്‍ക്കൈവ്‌സിന്റെ ഭാഗമായുള്ള പുസ്തക ശേഖരം മന്ത്രി രാമചന്ദ്രന്‍ കടന്നപ്പള്ളി ജില്ലയിലെ വിവിധ ഇടങ്ങളില്‍ ഏറ്റുവാങ്ങും. 26ന് വിവിധ കലാപരിപാടികളോടെ പൈതൃകോല്‍സവം സമാപിക്കും. പൈതൃകോത്സവത്തിന്റെ ലോഗോ, ബ്രോഷര്‍ പ്രകാശനച്ചടങ്ങ് തിരുവനന്തപുരത്ത് മുഖ്യമന്ത്രി പിണറായി വിജയന്‍ നിര്‍വഹിച്ചു. മന്ത്രി രാമചന്ദ്രന്‍ കടന്നപ്പള്ളിയുടെ സാന്നിധ്യത്തിലാണ് മുഖ്യമന്ത്രി 50 സെക്കന്റ് ദൈര്‍ഘ്യമുള്ള ലോഗോ ആനിമേഷന്‍ പ്രകാശനം ചെയ്തത്.