ന്യൂഡല്‍ഹി: എന്‍.സി.സിയുടെ പ്രവര്‍ത്തനങ്ങളെ കുറിച്ച് അറിയില്ലെന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ പ്രസ്താവനക്കെതിരെ വിമര്‍ശനവുമായി എന്‍.സി.സി കേഡറ്റുകള്‍. കര്‍ണാടകയിലെ മൈസൂരുവില്‍ മഹാറാണി ആര്‍ട്‌സ് ആന്റ് സയന്‍സ് വുമണ്‍സ് കോളേജിലെ വിദ്യാര്‍ത്ഥികളുമായി സംവദിക്കുമ്പോഴായിരുന്നു തനിക്ക് എന്‍സിസിയുടെ പ്രവര്‍ത്തനങ്ങളെ കുറിച്ച് ഒന്നുമറിയില്ലെന്ന് രാഹുല്‍ ഗാന്ധി സമ്മതിച്ചത്.

രാജ്യത്തെ വിവിധ സ്‌കൂളുകളിലും കോളേജുകളിലും സര്‍വ്വകലാശാലകളിലുമായി പടര്‍ന്നു കിടക്കുന്ന, 15 ലക്ഷത്തോളം അംഗബലമുള്ള സമാന്തര ആര്‍മി സംവിധാനത്തെ കുറിച്ചുള്ള അറിവില്ലായ്മ അല്‍പം കൂടിപ്പോയെന്ന് മഹാറാണി കോളേജിലെ എന്‍.സി.സി കേഡറ്റായ സഞ്ചന സിംഗ് പറഞ്ഞു. പ്രതിരോധ വകുപ്പിന്റെ തന്നെ രണ്ടാമത്തെ സമാന്തര സൈന്യസംവിധാനമാണ് എന്‍സിസി. മറ്റ് സംവിധാനങ്ങളോ പോലെ അല്ല എന്‍സിസി. അദ്ദേഹം അതിനെ കുറിച്ച് കൂടുതല്‍ പഠിക്കുമെന്നാണ് പ്രതീക്ഷിക്കുന്നതെന്നും സഞ്ചന പറഞ്ഞു.

    
തെരഞ്ഞെടുപ്പ് അടുത്തിരിക്കുന്ന കര്‍ണാടകയില്‍ ദ്വിദിന സന്ദര്‍ശനത്തിനിടെ മൈസൂരുവിലെ മഹാറാണി വനിത കോളേജിലെത്തിയ രാഹുല്‍ മുപ്പത് മിനുട്ടോളമാണ് വിദ്യാര്‍ഥികളുമായി സംവദിച്ചത്.