ഏറ്റുമാനൂര്‍: അനധികൃതമായി മണ്ണ് കടത്തിയ നാല് ടിപ്പര്‍ ലോറികള്‍ രണ്ടു ദിവസങ്ങളിലായി ഏറ്റുമാനൂര്‍ പൊലിസ് കസ്റ്റഡിയില്‍ എടുത്തു. ശനിയാഴ്ച ഉച്ചയോടെ വേദഗിരിയില്‍നിന്ന് രേഖകളില്ലാതെ മണ്ണ് കടത്തുകയായിരുന്ന മൂന്നു ടിപ്പര്‍ ലോറികളാണ് പിടികൂടിയത്.
വെച്ചൂര്‍, ആലപ്പുഴ ഭാഗത്ത് പഞ്ചായത്ത് റോഡ് പ്രവൃത്തിക്കെന്ന വ്യാജേന മണ്ണ് കടത്തുന്നുവെന്ന വിവരം ലഭിച്ചതിനെ തുടര്‍ന്ന് ഏറ്റുമാനൂര്‍ പൊലിസ് സബ് ഇന്‍സ്‌പെക്ടര്‍ പ്രശാന്ത് കുമാറിന്റെ നേതൃത്വത്തില്‍ നടത്തിയ പരിശോധനയിലാണ് വാഹനങ്ങള്‍ പിടികൂടിയത്. റോഡ് പ്രവൃത്തിക്ക് മണ്ണ് കൊണ്ടുപോകുന്നതായുള്ള മൈനിങ് ആന്‍ഡ് ജിയോളജി വകുപ്പില്‍ നിന്നുള്ള രേഖകളോ പാസോ ഒന്നും ഇല്ലായിരുന്നുവെന്ന് പൊലിസ് പറഞ്ഞു.
കഴിഞ്ഞ ദിവസം പുന്നത്തുറ കറ്റോട് കവലയില്‍നിന്ന് പിടികൂടിയ ഒരു ടിപ്പര്‍ ലോറി പിഴ അടച്ചതിനെ തുടര്‍ന്ന് വിട്ടുകൊടുത്തു.