ജിദ്ദ: സഊദിയില്‍ നഗര ഗ്രാമകാര്യ മന്ത്രാലയത്തില്‍ സമ്പൂര്‍ണ സ്വദേശിവല്‍ക്കരണം നടപ്പിലാക്കുന്നതിനു സാവകാശം വേണമെന്ന് ആവശ്യം. പരിചയ സമ്പന്നരായ വിദേശികളെ ജോലിയില്‍ നിന്ന് പിരിച്ചുവിടുന്നതിനെ മന്ത്രാലയം വിമര്‍ശിച്ചു.
നഗര ഗ്രാമകാര്യ മന്ത്രാലയത്തിന്റെ 2017 വാര്‍ഷിക റിപ്പോര്‍ട്ടിലാണ് വിദേശികളെ പിരിച്ചു വിടുന്നതിനെ വിമര്‍ശിക്കുന്നത്. ദീര്‍ഘകാലത്തെ പരിചയ സമ്പത്തുള്ള നിരവധി വിദേശികള്‍ മന്ത്രാലയത്തിനു കീഴില്‍ ജോലി ചെയ്യുന്നുണ്ട്. ഇവരെ പിരിച്ചുവിട്ടു പകരം മുന്‍പരിചയമില്ലാത്ത സഊദികളെ നിയമിക്കുന്നത് പ്രവര്‍ത്തനത്തെ ബാധിക്കും. പ്രധാനപ്പെട്ട തസ്തികകളില്‍ വിദേശികള്‍ക്ക് പകരം സഊദികളെ നിയമിക്കുന്നതിനു മുമ്പ് അവര്‍ക്ക് വിദേശികള്‍ തന്നെ വേണ്ടത്ര പരിശീലനം നല്‍കണം. ഇതിനുള്ള സാവകാശം ആവശ്യമാണ്. ആകര്‍ഷകമായ ശമ്പളവും ആനുകൂല്യങ്ങളും ലഭിക്കുന്നതിനാലും ജോലിഭാരവും മൂലം പരിചയ സമ്പന്നരായ പല ജീവനക്കാരും സ്വകാര്യ മേഖലയിലേക്ക് മാറുന്നതും മന്ത്രാലയത്തെ ബാധിക്കുന്നുണ്ടെന്ന് റിപ്പോര്‍ട്ട് പറയുന്നു.