കൊണ്ടോട്ടി: പൊടിരൂപത്തിലാക്കി കാലില്‍ കെട്ടിവച്ച് കടത്തിയ 12.8 ലക്ഷത്തിന്റെ സ്വര്‍ണം കരിപ്പൂര്‍ എയര്‍ കസ്റ്റംസ് ഇന്റലിജന്‍സ് പിടികൂടി. ഇന്നലെ ബഹ്‌റൈനില്‍ നിന്ന് എയര്‍ഇന്ത്യ എക്‌സ്പ്രസ് വിമാനത്തില്‍ കരിപ്പൂരിലെത്തിയ വയനാട് സ്വദേശി മുഹമ്മദ് യാസീന്‍(21)എന്ന യാത്രക്കാരനില്‍ നിന്നാണ് 421.6 ഗ്രാം സ്വര്‍ണം കണ്ടെത്തിയത്.
പൊടിരൂപത്തിലുള്ള സ്വര്‍ണം കാലില്‍ കെട്ടി സോക്‌സിനകത്ത് ഒളിപ്പിച്ചു കടത്തുകയായിരുന്നു. രഹസ്യ വിവരം ലഭിച്ചതനുസരിച്ച് കാത്തിരുന്ന കസ്റ്റംസ് ഇന്റലിജന്‍സ് വിഭാഗം ഇയാളെ പിടികൂടി ചോദ്യം ചെയ്യുകയായിരുന്നു. പരിശോധനയില്‍ ഒളിപ്പിച്ചുവച്ച നിലയില്‍ സ്വര്‍ണമടങ്ങിയ പൊടി കണ്ടെടുത്തു. ഇതില്‍ നിന്നാണ് 421.6 ഗ്രാം സ്വര്‍ണം വേര്‍തിരിച്ചെടുത്തത്. പിടികൂടിയ സ്വര്‍ണത്തിന് വിപണിയില്‍ 12,81,664 രൂപ വിലവരും.