നെടുമ്പാശ്ശേരി: അന്താരാഷ്ട്ര വിമാനത്താവളത്തിലെത്തിയ ഹെലികോപ്റ്റര്‍ റണ്‍വേയില്‍ നിന്ന് തെന്നിമാറി. തലനാരിഴക്കാണ് കൂടുതല്‍ അപകടം ഒഴിവായത്.കേന്ദ്ര സര്‍ക്കാരിന്റെ ഉടമസ്ഥതയിലുള്ള പവന്‍ ഹാന്‍സ് എന്ന പേരിലുള്ള ഹെലികോപ്റ്ററാണ് അപകടത്തില്‍പ്പെട്ടത്.
ഹെലികോപ്റ്റര്‍ ലാന്റ് ചെയ്യുന്നതിന് റണ്‍വേയില്‍ പ്രവേശിച്ച ശേഷം പെട്ടെന്ന് നിയന്ത്രണം വിട്ട് തെന്നി മാറുകയായിരുന്നു. നിശ്ചിത റണ്‍വെയില്‍ നിന്നും 145 മീറ്ററോളമാണ് തെന്നിമാറിയത്.ഇന്നലെ രാവിലെ 9 മണിയോടെയാണ് സംഭവം.
ലക്ഷദ്വീപില്‍ നിന്നും നെടുമ്പാശ്ശേരി വിമാനത്താവളത്തില്‍ എത്തിയ ഹെലികോപ്റ്ററില്‍ പൈലറ്റ് ഉള്‍പ്പെടെ നാല് പേരാണ് ഉണ്ടായിരുന്നത്.അപകടത്തെ തുടര്‍ന്ന് ഏതാനും സമയത്തേക്ക് വിമാന സര്‍വിസുകളും തടസപ്പെട്ടു. വിദഗ്ദ ഉദ്യോഗസ്ഥരെത്തി സംഭവം പരിശോധിച്ചതിനു ശേഷമാണ് ഇവിടേക്ക് വന്ന വിമാനങ്ങള്‍ക്ക് ഇറങ്ങാന്‍ അനുമതി നല്‍കിയത്. സിഗ്‌നല്‍ നല്‍കിയതിലെ അപാകതയോ പൈലറ്റിന്റെ വീഴ്ച്ചയോയായിരിക്കാം അപകടത്തിന് വഴിയൊരുക്കിയതെന്നാണ് പ്രാഥമിക നിഗമനം.
ഹെലികോപ്റ്ററിന്റെ സാങ്കേതിക തകരാറാണ് ദിശ മാറാന്‍ കാരണമായതെന്നാണ് വിമാനത്താവള അധികൃതരുടെ ഔദ്യോഗിക വിശദീകരണം. ഹെലികോപ്റ്റര്‍ തകരാര്‍ പരിഹരിക്കുന്നതിനുള്ള ശ്രമം ആരംഭിച്ചിട്ടുണ്ട്.