കണ്ണൂര്‍: കപ്പക്കടവ് ആലളാം മഖാം ഉറൂസ് നാളെ മുതല്‍ ഏപ്രില്‍ രണ്ടുവരെ നടക്കും. നാളെ ജുമുഅ നിസ്‌കാരാനന്തരം വളപട്ടണം അസ്സയ്യിദ് മശ്ഹൂര്‍ ഇമ്പിച്ചിക്കോയ തങ്ങള്‍ പതാക ഉയര്‍ത്തുന്നതോടെ ഉറൂസിന് തുടക്കമാകും.
രാത്രി ഏഴിന് ഉറൂസ് ഉദ്ഘാടനം കപ്പക്കടവ് ഖാസി സയ്യിദ് അഹമ്മദ് ജലാലുദ്ദീന്‍ ബുഖാരി തങ്ങള്‍ നിര്‍വഹിക്കും. കപ്പക്കടവ് മഹല്‍ ഖത്തീബ് അന്‍ഷാദ് ബാഖവി അധ്യക്ഷനാകും. ഡോ. അല്‍ഹാജ് സയ്യിദ് കാമില്‍ സാഹിബ് ഖാദിരി മുഖ്യാതിഥിയാവും. ദിഖ്‌റിലൂടെ റബ്ബിനെ അറിയുക എന്ന വിഷയത്തില്‍ മുഹമ്മദ് ഷമ്മാസ് തൊടുപുഴ മതപ്രഭാഷണം നടത്തും.
31ന് രാത്രി 7.30ന് മഹ്‌ളറത്തുല്‍ ബദ്‌രിയ്യക്ക് മുഹമ്മദ് ശരീഫ് സഅദി മാവിലാടം നേതൃത്വം നല്‍കും. രാത്രി ഒന്‍പതിന് കഥാപ്രസംഗം അബ്ദുസമദ് ദാരിമി ആന്‍ഡ് പാര്‍ട്ടി അവതരിപ്പിക്കും. ഏപ്രില്‍ ഒന്നിന് ഉച്ചക്ക് രണ്ടിന് സ്വലാത്ത് വാര്‍ഷിക ഉദ്‌ബോധനം ഉഖ്ബാല്‍ സത്താര്‍ ബാഖവി മംഗലാപുരം നടത്തും. പ്രാര്‍ഥനക്ക് മാണിയൂര്‍ അഹ്മദ് മുസ്‌ലിയാര്‍ നേതൃത്വം നല്‍ക്കും.
രാത്രി ഏഴിന് ബുര്‍ദ മജ്‌ലിസ്. രാത്രി ഒന്‍പതിന് ഷിഹാബുദ്ദീന്‍ അമാനി മൂവാറ്റുപുഴ മതപ്രഭാഷണം എന്നിവ നടക്കും. സമാപനദിവസമായ രണ്ടിന് രാവിലെ 10ന് മൗലീദ് പാരായണവും നേര്‍ച്ചകഞ്ഞി വിതരണവും നടക്കും.
ഉറൂസ് പ്രമാണിച്ച് ജലഗതാഗത വകുപ്പിന്റെ ബോട്ട് മാട്ടൂല്‍ മുതല്‍ പാപ്പിനിശ്ശേരി വരെ ഉച്ചക്ക് ഒന്നുമുതല്‍ രാത്രി എട്ടു മണിവരെ സ്‌പെഷ്യല്‍ സര്‍വിസ് നടത്തുമെന്ന് ഉറൂസ് കമ്മിറ്റി ഭാരവാഹികള്‍ അറിയിച്ചു.