പെരുമ്പാവൂര്‍: എറണാകുളം ജില്ലയിലെ മജ്‌ലിസുന്നൂര്‍ കൂട്ടായ്മയുടെ കേന്ദ്രീകൃത ജില്ലാതല ആത്മീയ സംഗമം ഏപ്രില്‍ ഏഴിന് മുടിക്കല്‍ ജുമാമസ്ജിദിനു സമീപം പ്രത്യേകം ഒരുക്കുന്ന ചെമ്പിട്ടപള്ളി ഉസ്താദ് നഗറില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ശനിയാഴ്ച വൈകിട്ട് ഏഴ് മണിക്ക് ആരംഭിക്കുന്ന പരിപാടി സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം ഇ.എസ് ഹസ്സന്‍ഫൈസി ഉദ്ഘാടനം ചെയ്യും. എസ്.വൈ.എസ് സംസ്ഥാന ജനറല്‍ സെക്രട്ടറിയും മജ്‌ലിസുന്നൂര്‍ സംസ്ഥാന അമീറും കോഴിക്കോട് ഖാളിയുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി സംഗമത്തിന് നേതൃത്വം നല്‍കും.
ശൈഖുനാ ചെറുവാളൂര്‍ ഹൈദ്രോസ് മുസ്‌ലിയാരുടെ പ്രാര്‍ഥനയോടെ സംഗമത്തിന് തുടക്കം കുറിക്കും. എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ് ഉസ്താദ് ബഷീര്‍ ഫൈസി ദേശമംഗലം മുഖ്യപ്രഭാഷണം നടത്തും. ജില്ലാ പ്രസിഡന്റ് എന്‍.കെ മുഹമ്മദ്‌ഫൈസി അധ്യക്ഷത വഹിക്കും. ജില്ലയിലെ പ്രമുഖ പണ്ഡിതന്മാര്‍ സംഗമവേദിയിലെ സാന്നിദ്ധ്യമാകും.വാര്‍ത്താസമ്മേളനത്തില്‍ എന്‍.കെ. മുഹമ്മദ് ഫൈസി (ചെയര്‍മാന്‍), മുട്ടം അബ്ദുള്ള (ജനറല്‍ കണ്‍വീനര്‍), സി.എം. അബ്ദുല്‍ റഹ്മാന്‍കുട്ടി (ജനറല്‍ സെക്രട്ടറി), ടി.എച്ച് മുഹമ്മദലി (പബ്ലിസിറ്റി കമ്മിറ്റി ചെയര്‍മാന്‍), സി.വി. കബീര്‍ മുട്ടം (പബ്ലിസിറ്റി കണ്‍വീനര്‍) എന്നിവര്‍ സംബന്ധിച്ചു.