കണ്ണൂര്‍: കീഴാറ്റൂരില്‍ വയല്‍ ഏറ്റെടുത്ത് ബൈപാസ് നിര്‍മിക്കുന്നതിന് സി.പി.എം നിലകൊള്ളുന്നതിനു പിന്നില്‍ വന്‍ സാമ്പത്തിക അഴിമതിയാണെന്ന് ബി.ജെ.പി സംസ്ഥാന സെക്രട്ടറി അഡ്വ.ബി. ഗോപാലകൃഷ്ണന്‍. കോടിക്കണക്കിന് രൂപയുടെ അഴിമതിയാണ് വയല്‍ ഏറ്റെടുക്കലുമായി ബന്ധപ്പെട്ട് നടക്കാന്‍ പോകുന്നത്.
ഏതാണ്ട് 43 കോടി രൂപ വരുന്ന മൂന്നര ലക്ഷം ടണ്‍ കളിമണ്ണാണ് റോഡ് നിര്‍മാണത്തിന് മുമ്പ് ഇവിടെനിന്ന് കുഴിച്ചെടുക്കുക. എട്ട് ലക്ഷം ടണ്‍ മണ്ണും ഇവിടം നികത്താനായി വേണ്ടി വരും. ഇതിനു രണ്ടിനും പിന്നില്‍ വന്‍ സാമ്പത്തിക അഴിമതിയാണ് നടക്കാനിരിക്കുന്നത്.
കീഴാറ്റൂര്‍ വിഷയം ബി.ജെ.പി ഏറ്റെടുക്കാനാണ് തീരുമാനം. 'കീഴടങ്ങില്ല കീഴാറ്റൂര്‍' എന്ന പേരില്‍ 3ന് ബി.ജെ.പി മാര്‍ച്ച് നടത്തും. കേന്ദ്ര സര്‍ക്കാരാണ് അലൈന്‍മെന്റ് നിശ്ചയിക്കുന്നതെങ്കില്‍ എന്തുകൊണ്ട് മുഖ്യമന്ത്രി പിണറായി ഡല്‍ഹിയില്‍ എത്തി ഗതാഗതമന്ത്രിയെ കണ്ട് കീഴാറ്റൂര്‍ വഴിയുള്ള അലൈന്‍മെന്റ് മാറ്റാന്‍ ആവശ്യപ്പെട്ടില്ലെന്നും അദ്ദേഹം ചോദിച്ചു. സി.പി.ഐ കേരളത്തില്‍ ആണും പെണ്ണുമല്ലാത്ത ശിഖണ്ഡിയുടെ രാഷ്ട്രീയമാണ് കളിക്കുന്നതെന്നും അദ്ദേഹം പരിഹസിച്ചു.
ഒന്നര സെന്റ് നികത്തിയ വര്‍ക്ക്‌ഷോപ്പുടമയുടെ ഭൂമിയില്‍ കൊടികുത്തിയ കൃഷി മന്ത്രി എന്തു കൊണ്ട് ഇത്രയും കാലം കീഴാറ്റൂര്‍ സന്ദര്‍ശിച്ചില്ലെന്ന് സി.പി.ഐ നേതൃത്വം വ്യക്തമാക്കണമെന്നും അദ്ദേഹം പറഞ്ഞു.