ന്യൂഡല്‍ഹി: മുഖ്യമന്ത്രിയുടെ വിവാദമായ അഭിമുഖത്തില്‍ ഖേദപ്രകടനവുമായി 'ദ ഹിന്ദു' പത്രം. അഭിമുഖം വന്നത് ഡല്‍ഹിയിലെ പി.ആര്‍ ഏജന്‍സി വഴിയാണ്, വിവാദഭാഗം മുഖ്യമന്ത്രി അഭിമുഖത്തില്‍ പറഞ്ഞതല്ലെന്നും പിന്നീട് പി.ആര്‍ ഏജന്‍സി എഴുതി നല്‍കിയതാണെന്നും ദി ഹിന്ദു അറിയിച്ചു. ഇത് മാധ്യമധാര്‍മികതയ്ക്ക് നിരക്കുന്നതല്ലെന്നും ആ വാക്കുകള്‍ അഭിമുഖത്തിലേതായി ഉള്‍പ്പെടുത്തിയതില്‍ ഖേദിക്കുന്നുവെന്ന് ഹിന്ദു അറിയിച്ചു.

ഓണ്‍ലൈനില്‍ വന്ന വാര്‍ത്തയുടെ താഴെയാണ് എഡിറ്ററുടെ വിശദീകരണം എന്നനിലയില്‍ എഴുതി നല്‍കിയത്. 

അഭിമുഖം വിവാദമായതോടെ നടത്തിയ പരിശോധനയ്ക്ക് ശേഷമാണ് ദി ഹിന്ദുവിന്റെ വിശദീകരണം. വിഷയത്തില്‍ വ്യക്തത വരുത്തണമെന്ന് ആവശ്യപ്പെട്ട് മുഖ്യമന്ത്രിയുടെ ഓഫിസില്‍ നിന്ന്  ദി ഹിന്ദു എഡിറ്റര്‍ക്ക് കത്തയച്ചതിന് പിന്നാലെയാണ് വിശദീകരണം വന്നത്. പരാമര്‍ശം തെറ്റായി വ്യാഖ്യാനിച്ചെന്നും തെറ്റായ വ്യാഖ്യാനം വിവാദങ്ങള്‍ക്ക് ഇടയാക്കിയെന്നും കത്തില്‍ പറയുന്നു. ഒരു സ്ഥലമോ പ്രദേശമോ പരാമര്‍ശിച്ചിട്ടില്ലെന്നും വിവാദം അവസാനിപ്പിക്കാന്‍ വിശദീകരണം നല്‍കണമെന്നും കത്തില്‍ ആവശ്യപ്പെട്ടിരുന്നു. 

കള്ളക്കടത്ത് സ്വര്‍ണവും പണവും തീവ്രവാദത്തിന് ഉപയോഗിച്ചെന്നാണ് ഉദ്ദേശിച്ചത്. എന്നാല്‍ ഈ പരാമര്‍ശത്തെ പത്രം തെറ്റായി വ്യാഖ്യാനിച്ചുവെന്ന് കത്തില്‍ ചൂണ്ടിക്കാണിച്ചിട്ടുണ്ട്. മലപ്പുറം ജില്ലയില്‍ നിന്ന് കഴിഞ്ഞ അഞ്ച് വര്‍ഷത്തിനിടെ 123 കോടി രൂപയുടെ 150 കിലോ സ്വര്‍ണ്ണവും ഹവാല പണവും സംസ്ഥാന പൊലീസ് പിടിച്ചെടുത്തുവെന്നും ഈ പണം രാജ്യവിരുദ്ധ ദേശവിരുദ്ധ പ്രവര്‍ത്തനങ്ങള്‍ക്കുമാണ് ഉപയോഗിച്ചതെന്നുമായിരുന്നു ഹിന്ദു പത്രത്തില്‍ മുഖ്യമന്ത്രി പറഞ്ഞതായി വന്നിരുന്നത്.

മുഖ്യമന്ത്രി മലപ്പുറം വിരുദ്ധ പരാമര്‍ശം നടത്തിയെന്ന ഹിന്ദു വാര്‍ത്തയുടെ അടിസ്ഥാനത്തില്‍ പ്രതിപക്ഷ പാര്‍ട്ടികളും മറ്റുള്ള സംഘടനകളും രംഗത്തുവന്നിരുന്നു. വിഷയത്തെ വലിയ രാഷ്ട്രീയ ആയുധമാക്കാന്‍ പ്രതിപക്ഷമുള്‍പ്പെടെയുള്ളവര്‍ രംഗത്തുവന്നതിനിടെയാണ് മുഖ്യമന്ത്രിയുടെ ഓഫീസിന്റെ നടപടി.

The Hindu newspaper has issued a clarification following a controversial interview with the Chief Minister, stating that certain contentious remarks attributed to him were not originally made during the interview but were instead provided by a PR agency.