തിരുവനന്തപുരം: സംസ്ഥാനത്ത് സംരംഭകത്വവികസനത്തിനായി നടത്തുന്ന പരിശ്രമങ്ങള്‍ക്ക് മികച്ച സര്‍ക്കാര്‍ സ്ഥാപനത്തിനുള്ള മുഖ്യമന്ത്രിയുടെ പുരസ്‌കാരം കേരള സ്റ്റാര്‍ട്ടപ് മിഷന്‍ നേടി. സ്റ്റാര്‍ട്ടപ് സംസ്‌കാരം വളര്‍ത്തിയെടുക്കാന്‍ ലക്ഷ്യമിട്ടുള്ള യുവസംരംഭകത്വ വികസന പദ്ധതിയുടെ അടിസ്ഥാനത്തിലാണ് സ്റ്റാര്‍ട്ടപ് മിഷന് പുരസ്‌കാരം ലഭിച്ചത്.
സെക്രട്ടേറിയറ്റ് ദര്‍ബാര്‍ ഹാളില്‍ നടന്ന ചടങ്ങില്‍ മന്ത്രി കെ.കെ ശൈലജ സ്റ്റാര്‍ട്ടപ് മിഷന്‍ സി.ഇ.ഒ ഡോ. സജി ഗോപിനാഥിന് പുരസ്‌കാരം സമ്മാനിച്ചു. മന്ത്രി ടി.പി രാമകൃഷ്ണന്‍ അധ്യക്ഷനായി. ചീഫ് സെക്രട്ടറി പോള്‍ ആന്റണി, അഡിഷനല്‍ ചീഫ് സെക്രട്ടറി ടോം ജോസ്, സാമൂഹികനീതി വകുപ്പ് സ്‌പെഷല്‍ സെക്രട്ടറി ബിജു പ്രഭാകര്‍ പങ്കെടുത്തു.
സംരംഭകത്വ വികസനത്തിനും സംരംഭങ്ങളുടെ ഇന്‍കുബേഷനും വേണ്ടി പ്രവര്‍ത്തിക്കുന്ന സര്‍ക്കാര്‍ സ്ഥാപനമാണ് കേരള സ്റ്റാര്‍ട്ടപ് മിഷന്‍. സ്റ്റാര്‍ട്ടപ് നയം നടപ്പിലാക്കുന്നതിനും സ്റ്റാര്‍ട്ടപ്പുകളുടെ വളര്‍ച്ചയ്ക്കുമായി ബഹുമുഖപരിപാടികളാണ് സ്റ്റാര്‍ട്ടപ് മിഷന്‍ ആവിഷ്‌ക്കരിച്ചിട്ടുള്ളത്.