തലശ്ശേരി: തലശ്ശേരി കലാപത്തെക്കുറിച്ച് പുനരന്വേഷണം നടത്താന്‍ എല്‍.ഡി.എഫ് സര്‍ക്കാരോ സി.പി.എമ്മോ തയാറുണ്ടോയെന്ന് കോണ്‍ഗ്രസ് നേതാവ് കെ. സുധാകരന്‍. ശുഹൈബ് വധത്തെതുടര്‍ന്ന് ഡി.സി.സി പ്രസിഡന്റ് സതീശന്‍ പാച്ചേനി നടത്തിയ നവദര്‍ശന്‍ യാത്രയുടെ സമാപന സമ്മേളനം തലശ്ശേരി പഴയ ബസ്സ്റ്റാന്റ് പരിസരത്ത് ഉദ്ഘാടനം ചെയ്യുകയായിരുന്നു അദ്ദേഹം. തലശ്ശേരി കലാപത്തെക്കുറിച്ച് പുനരന്വേഷണം നടത്തിയാല്‍ പുതിയതായി തെളിവ് നല്‍കാന്‍ നിരവധിയാളുകള്‍ സന്നദ്ധരായിട്ടുണ്ട്.
ആരാണ് കലാപത്തിന് പിന്നിലെന്ന് വിധയത്തില്‍ കമ്മിഷന്‍ റിപ്പോര്‍ട്ടില്‍ തന്നെ സൂചനയുണ്ട്. സി.പി.എം പദ്ധതിയിട്ട കലാപമായിരുന്നു തലശ്ശേരിയില്‍ നടന്നത്. ക്ഷേത്രാഘോഷ യാത്ര കടന്നുപോകുന്നതിനിടെ നൂര്‍ജഹാന്‍ ഹോട്ടലിന്റെ മുകളില്‍ നിന്ന് ചെരുപ്പ് എറിഞ്ഞതാണ് കലാപത്തിന് കാരണമായത്. ഇതിന് പിന്നില്‍ സി.പി.എം ആണ്. കലാപം കൊടുമ്പിരി കൊള്ളുമ്പോള്‍ കൊടിവച്ച കാറില്‍ പിണറായി വിജയന്‍ ധൈര്യമായത്തിയത് സി.പി.എം പ്രവര്‍ത്തകരാണ് കലാപത്തിന് പിന്നിലെന്നതു കൊണ്ടാണ്.
മെരുവമ്പായി പള്ളിക്ക് കാവല്‍ നിന്നപ്പോഴാണ് സി.പി.എം പ്രവര്‍ത്തകനായ യു.കെ കുഞ്ഞിരാമന്‍ വെടിയേറ്റ് മരിച്ചെന്നാണ് പ്രചരിപ്പിക്കുന്നത്. കുഞ്ഞിരാമന്‍ അവിടെയുള്ള കള്ളുഷാപ്പിലെ പ്രശ്‌നത്തിനിടെയാണ് കൊല്ലപ്പെട്ടതെന്നും സുധാകരന്‍ പറഞ്ഞു. എം.പി അരവിന്ദാക്ഷന്‍ അധ്യക്ഷനായി. സതീശന്‍ പാച്ചേനി, അഡ്വ. ടി. ആസഫലി, കെ. സുരേന്ദ്രന്‍ സംസാരിച്ചു.