പാലക്കാട്‌: ദേശീയ പതാക കാവിയാക്കണമെന്ന പരാമർശത്തിൽ എടുത്ത കേസിൽ ബിജെപി നേതാവ് എൻ ശിവരാജന് പൊലിസ് നോട്ടീസ്. പാലക്കാട് ടൗൺ സൗത്ത് പൊലിസാണ് ശിവരാജിന് നോട്ടീസ് നൽകിയത്. വിവിധ സംഘടനകൾ നൽകിയ പരാതിയിൽ ബിഎൻഎസ് 192 വകുപ്പ് പ്രകാരമാണ് കേസ് എടുത്തിരുന്നത്.

ഇന്ത്യയുടെ ദേശീയ പതാക ത്രിവർണ പതാകയ്ക്ക് പകരം കാവിക്കൊടി ആക്കണം എന്നായിരുന്നു ശിവരാജൻ നടത്തിയ പ്രസംഗം. ഭാരതാംബ വിവാദത്തിൽ പുഷ്പാർച്ചനക്ക് ശേഷം പ്രതികരിക്കുമ്പോഴായിരുന്നു ശിവരാജന്റെ ഈ പരാമർശം.  

ദേശീയ പതാകയ്ക്ക് സമാനമായ പതാക രാഷ്ട്രീയ പാർട്ടികൾ ഉപയോഗിക്കുന്നത് നിരോധിക്കണമെന്നും ശിവരാജൻ പറഞ്ഞിരുന്നു. കോൺഗ്രസ് പാർട്ടി പച്ച പതാക ഉപയോഗിക്കട്ടെ, ഇന്ത്യയുടെ ചരിത്രങ്ങൾ അറിയാത്ത രാഹുൽ ഗാന്ധിയും സോണിയ ഗാന്ധിയും ഇറ്റാലിയൻ കൊടി ഉപയോഗിക്കട്ടെ എന്നും ശിവരാജൻ വ്യക്തമാക്കിയിരുന്നു. ബിജെപി മുൻ ദേശീയ കൗൺസിൽ അംഗം കൂടിയായിരുന്നു എൻ ശിവരാജൻ.

Police notice issued to BJP leader N Sivarajan for making the national flag saffron