സംസ്ഥാനത്ത് മഴ മുന്നറിയിപ്പിൽ മാറ്റം. ജാർഖണ്ഡിന് മുകളിൽ ന്യൂനമർദ്ദം നിലനിൽക്കുന്നതിനാൽ കേരളത്തിൽ അടുത്ത അഞ്ച് ദിവസം ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ജൂലൈ 2 മുതൽ 5 വരെ ഒറ്റപ്പെട്ട ശക്തമായ മഴ പ്രതീക്ഷിക്കുന്നതായി പ്രവചനം. ഇന്ന് (ജൂലൈ 1) മുതൽ 3 വരെ കേരളത്തിൽ മണിക്കൂറിൽ 40 മുതൽ 50 കിലോമീറ്റർ വേഗതയിൽ ശക്തമായ കാറ്റിനും സാധ്യതയുണ്ട്.

യെല്ലോ അലർട്ട് പ്രഖ്യാപനം

വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്:

ജൂലൈ 2: കോഴിക്കോട്, കണ്ണൂർ, കാസർകോട്
ജൂലൈ 3: കണ്ണൂർ, കാസർകോട്
ജൂലൈ 4: എറണാകുളം, കോഴിക്കോട്, വയനാട്, കണ്ണൂർ, കാസർകോട്
ജൂലൈ 5: കണ്ണൂർ, കാസർകോട്
ഒറ്റപ്പെട്ട ശക്തമായ മഴയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യമാണ് ശക്തമായ മഴ എന്നതുകൊണ്ട് ഉദ്ദേശിക്കുന്നത്.

ശക്തമായ കാറ്റ് ജാഗ്രതാ നിർദേശം

ഇന്ന് മുതൽ ജൂലൈ 3 വരെ ഒറ്റപ്പെട്ട പ്രദേശങ്ങളിൽ മണിക്കൂറിൽ 40 മുതൽ 50 കിലോമീറ്റർ വേഗതയിൽ ശക്തമായ കാറ്റിന് സാധ്യതയുണ്ട്. ശക്തമായ കാറ്റ് കേരളത്തിൽ ഏറ്റവും കൂടുതൽ നാശനഷ്ടവും ജീവഹാനിയും ഉണ്ടാക്കുന്ന ദുരന്തമാണ്. മരങ്ങൾ കടപുഴകുകയോ ചില്ലകൾ ഒടിഞ്ഞുവീഴുകയോ ചെയ്ത് അപകടങ്ങൾ ഉണ്ടാകാനുള്ള സാധ്യതയുണ്ട്. കാറ്റും മഴയും ഉണ്ടാകുമ്പോൾ മരങ്ങളുടെ ചുവട്ടിൽ നിൽക്കരുതെന്നും വാഹനങ്ങൾ മരച്ചുവട്ടിൽ പാർക്ക് ചെയ്യരുതെന്നും കാലാവസ്ഥാ വകുപ്പ് മുന്നറിയിപ്പ് നൽകുന്നു.

മത്സ്യത്തൊഴിലാളികൾക്കുള്ള ജാഗ്രതാ നിർദേശം

കേരള, കർണാടക, ലക്ഷദ്വീപ് തീരങ്ങളിൽ ജൂലൈ 1ന് മത്സ്യബന്ധനത്തിന് തടസമില്ല. എന്നാൽ, ഇനിപ്പറയുന്ന പ്രദേശങ്ങളിൽ ശക്തമായ കാറ്റിനും മോശം കാലാവസ്ഥക്കും സാധ്യത:

സോമാലിയൻ തീരം, ഒമാൻ, യമൻ തീരം, മധ്യ-പടിഞ്ഞാറൻ, മധ്യ-കിഴക്കൻ, വടക്കു-കിഴക്കൻ, വടക്കു-പടിഞ്ഞാറൻ, തെക്കു-പടിഞ്ഞാറൻ അറബിക്കടൽ, തെക്കൻ തമിഴ്നാട് തീരം, ഗൾഫ് ഓഫ് മാന്നാർ, കന്യാകുമാരി: മണിക്കൂറിൽ 45-55 കിലോമീറ്റർ വേഗതയിൽ കാറ്റ്, ചിലപ്പോൾ 65 കിലോമീറ്റർ വരെ.
മധ്യ ബംഗാൾ ഉൾക്കടൽ, വടക്കൻ ആന്ധ്രാപ്രദേശ്, വടക്കൻ ബംഗാൾ ഉൾക്കടൽ, ഒഡീഷ, പശ്ചിമ ബംഗാൾ, ബംഗ്ലാദേശ്, ആൻഡമാൻ കടൽ: മണിക്കൂറിൽ 40-50 കിലോമീറ്റർ വേഗത, ചിലപ്പോൾ 60 കിലോമീറ്റർ വരെ.
ഗുജറാത്ത്, കൊങ്കൺ, ഗോവ, മധ്യ-പടിഞ്ഞാറൻ ബംഗാൾ ഉൾക്കടൽ, വടക്കൻ ആന്ധ്രാപ്രദേശ്: മണിക്കൂറിൽ 45-55 കിലോമീറ്റർ വേഗത, ചിലപ്പോൾ 65 കിലോമീറ്റർ വരെ.
മത്സ്യത്തൊഴിലാളികൾ ഈ പ്രദേശങ്ങളിൽ ജാഗ്രത പാലിക്കണമെന്ന് കാലാവസ്ഥാ വകുപ്പ് നിർദേശിക്കുന്നു.

Kerala is set to experience heavy rainfall and strong winds for the next five days due to a low-pressure system over Jharkhand, as per the India Meteorological Department (IMD). From July 2 to 5, isolated heavy rainfall (64.5–115.5 mm in 24 hours) is expected, with winds reaching 40–50 kmph until July 3. Yellow alerts have been issued for Kozhikode, Kannur, and Kasaragod on July 2; Kannur and Kasaragod on July 3; Ernakulam, Kozhikode, Wayanad, Kannur, and Kasaragod on July 4; and Kannur and Kasaragod on July 5. Strong winds may cause trees to fall, posing risks, and people are advised to avoid standing under trees or parking vehicles there. No fishing restrictions are in place for Kerala, Karnataka, and Lakshadweep coasts on July 1, but rough sea conditions are expected in parts of the Arabian Sea and Bay of Bengal, with wind speeds up to 65 kmph. Fishermen are urged to exercise caution.