കോഴിക്കോട്: കേരള വിദ്യാഭ്യാസ നിയമത്തിലെ പഴുതുകള്‍ ഉപയോഗിച്ച് തുടര്‍ച്ചയായി സ്‌കൂളുകള്‍ അടച്ചു പൂട്ടുന്നതിനെതിരേ ജനകീയ പ്രതിരോധ സമിതിയുടേയും ആള്‍ ഇന്ത്യ സേവ് എജ്യുക്കേഷന്‍ കമ്മിറ്റിയുടേയും സംയുക്താഭിമുഖ്യത്തില്‍ പൊതുവിദ്യാഭ്യാസ കൂട്ടായ്മ സംഘടിപ്പിച്ചു.
മലാപറമ്പ് സ്‌കൂളും തിരുവണ്ണൂര്‍ പാലാട്ട് സ്‌കൂളുമെല്ലാം അടച്ചുപൂട്ടുന്നത് കച്ചവടക്കണ്ണുള്ള മാനേജര്‍മാരാണെന്നും ഇത് കേരള സമൂഹം അംഗീകരിക്കില്ലെന്നും പൊതു വിദ്യാഭ്യാസ കൂട്ടായ്മ പ്രഖ്യാപിച്ചു. പൊതു വിദ്യാലയങ്ങള്‍ പൊതുസ്വത്താണ്. സ്‌കൂള്‍ നടത്തിപ്പ് ചുമതല വിദ്യാഭ്യാസ നിയമത്തിലെ വ്യവസ്ഥകള്‍ പ്രകാരം മാനേജര്‍മാര്‍ക്കാണെങ്കിലും വിദ്യാലയം അടച്ചു പൂട്ടാനുള്ള അധികാരം മാനേജര്‍മാര്‍ക്ക് നല്‍കാന്‍ പാടില്ലെന്നും കൂട്ടായ്മയില്‍ ചൂണ്ടിക്കാട്ടി. ഇവ നടപ്പാക്കാനായി വിദ്യാഭ്യാസ നിയമത്തിലും ചട്ടങ്ങളിലും ഭേദഗതി വരുത്താന്‍ സംസ്ഥാന സര്‍ക്കാര്‍ മുന്‍കൈയെടുക്കണമെന്നും കൂട്ടായ്മ ആവശ്യപ്പെട്ടു. ആള്‍ ഇന്ത്യ സേവ് എജ്യുക്കേഷന്‍ കമ്മിറ്റി സംസ്ഥാന സെക്രട്ടറി എം ഷാജഹാന്‍ മുഖ്യ പ്രഭാഷണം നടത്തി. ജനകീയ പ്രതിരോധ സമിതി ജില്ലാ കണ്‍വീനര്‍ എ. ശേഖര്‍ അധ്യക്ഷനായി. വി.പി വാസുദേവന്‍, അഡ്വ. ടി.പി സന്തോഷ്‌കുമാര്‍, നമ്പിടി നാരായണന്‍, ടി. ശശിധരന്‍, സി.വി കുമാരന്‍ സംസാരിച്ചു.