മറ്റത്തൂര്‍: സന്തോഷ് ട്രോഫി നേടിയ കേരള ഫുട്‌ബോള്‍ ടീമിന്റെ മുന്നേറ്റനിരയിലെ കൗമാരതാരം പി.സി അനുരാഗിന് സ്ഥലവും വീടും നല്‍കുമെന്ന് സ്ഥലം എം.എല്‍.എയും വിദ്യാഭ്യാസ മന്ത്രിയുമായ പ്രൊഫ. സി. രവീന്ദ്രനാഥ്.
കേരളം സന്തോഷ് ട്രോഫി നേടിയ ഞായറാഴ്ച വൈകിട്ട് മറ്റത്തൂര്‍, വാസുപുരത്ത് കനാല്‍ പുറമ്പോക്കിലുള്ള അനുരാഗിന്റെ വൈദ്യുതി പോലുമില്ലാത്ത ഓലക്കുടില്‍ സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു മന്ത്രി.
ഏതുപദ്ധതി പ്രകാരമാണ് സ്ഥലവും വീടും നല്‍കുകയെന്നത് ബന്ധപ്പെട്ട വകുപ്പുകളുമായി ആലോചിച്ചു തീരുമാനിക്കുമെന്ന് മന്ത്രി പറഞ്ഞു.