ജിദ്ദ: 27 വര്‍ഷത്തിനു ശേഷം സഊദിയില്‍ തങ്ങളുടെ വിമാനമിറക്കി ഇറാഖ് എയര്‍ലൈന്‍സ്. ആദ്യ വിമാനം ശനിയാഴ്ചയാണ് റിയാദിലെത്തിയത്.
ചരിത്ര നിമിഷത്തിന്റെ സന്തോഷം ഇറാഖ് പൈലറ്റ് കോക്പിറ്റില്‍ നിന്ന് റെക്കോര്‍ഡ് ചെയ്ത സന്ദേശം സമൂഹമാധ്യമങ്ങളില്‍ പങ്കുവച്ചു.
ഇരുരാജ്യങ്ങള്‍ക്കുമിടയില്‍ യാത്രാസൗകര്യം വര്‍ധിക്കുന്നതിനുള്ള സൂചനയായി ഇതുസംബന്ധിച്ച വിഡിയോ സമൂഹമാധ്യമങ്ങളില്‍ വൈറലായിട്ടുണ്ട്. റിയാദ് കിങ് ഖാലിദ് അന്താരാഷ്ട്ര വിമാനത്താവളത്തില്‍ വിമാനമിറക്കുമ്പോള്‍ പൈലറ്റ് ഇറാഖി പതാക വീശുന്നതും ദൃശ്യത്തിലുണ്ട്.
സഊദിയില്‍ നിന്ന് സഊദി എയര്‍ലൈന്‍സും നാസ് എയറും ഇറാഖിലെ വിവിധ നഗരങ്ങളിലേക്ക് സര്‍വിസ് തുടങ്ങിയതിനു തുടര്‍ച്ചയായാണ് ഇറാഖ് എയര്‍ലൈന്‍സിന്റെ റിയാദ് യാത്ര.
കിഴക്കന്‍ പ്രവിശ്യയിലെ ദമാം കിങ് ഫഹദ് അന്താരാഷ്ട്ര വിമാനത്താവളത്തിലേക്കുള്ള സര്‍വിസ് ഉടന്‍ ആരംഭിക്കുമെന്നും അധികൃതര്‍ വ്യക്തമാക്കി.