ഭുവനേശ്വര്‍: രണ്ട് ഗോളിന് മുന്നിലെത്തിയ ടീം 12 മിനുട്ടിനുള്ളില്‍ വഴങ്ങിയത് മൂന്ന് ഗോളുകള്‍. ഫലം- 2-3ന്റെ തോല്‍വി. 'കേരള ബ്ലാസ്റ്റേഴ്‌സ് എന്തൊരു തോല്‍വി' . ഇന്ത്യന്‍ സൂപ്പര്‍ കപ്പിന്റെ ക്വാര്‍ട്ടറിലേക്ക് മുന്നേറാനുള്ള സുവാര്‍ണാവസരം ബ്ലാസ്റ്റേഴ്‌സ് കളഞ്ഞുകുളിച്ചു. പടിക്കല്‍ കലമുടച്ച് ദുരന്തമായി തീരുന്ന പതിവ് രീതി ബ്ലാസ്റ്റേഴ്‌സ് നെരോക്ക എഫ്.സിക്കെതിരായ പോരാട്ടത്തിലും തുടര്‍ന്നു.
ആദ്യ പകുതിയില്‍ പുള്‍ഗയിലൂടെയും രണ്ടാം പകുതിയില്‍ പ്രശാന്തിലൂടെയുമാണ് കേരള ബ്ലാസ്റ്റേഴ്‌സ് നെരോക്കയ്‌ക്കെതിരേ മുന്നിലെത്തിയത്. എന്നാല്‍ 71ാം മിനുട്ടില്‍ മൈക്കല്‍ ജോക്വിം, 79ാം മിനുട്ടില്‍ വില്ല്യംസ് എന്നിവരുടെ ഗോളില്‍ നെരോക്ക സമനില പിടിച്ചു.
പിന്നീട് ബോക്‌സിനുള്ളില്‍ വെസ് ബ്രൗണിന്റെ കൈയില്‍ പന്ത് തട്ടിയതിനെ തുടര്‍ന്ന് നെരോക്കയ്ക്ക് അനുകൂലമായി പെനാല്‍റ്റി. കിക്കെടുത്ത ഫെലിക്‌സിന്റെ ഷോട്ട് വലയില്‍. 2-3ന് ബ്ലാസ്റ്റേഴ്‌സിനെ ഞെട്ടിച്ച് നെരോക്ക സൂപ്പര്‍ കപ്പിന്റെ ക്വാര്‍ട്ടറിലേക്ക്. ബംഗളൂരു എഫ്.സിയാണ് നെരോക്കയുടെ ക്വാര്‍ട്ടറിലെ എതിരാളി.

.