കൊച്ചി: സ്വാശ്രയ മെഡിക്കല്‍ ഫീസ് നിര്‍ണയത്തിനെതിരേ സ്വകാര്യ മാനേജ്‌മെന്റുകള്‍ നല്‍കിയ ഹരജികള്‍ ഹൈക്കോടതി നാളെ പരിഗണിക്കും.
സ്വാശ്രയ മെഡിക്കല്‍ കോളജുകളിലെ ഫീസ് നിര്‍ണയിച്ച് കഴിഞ്ഞ നവംബറില്‍ പ്രവേശന - ഫീസ് റെഗുലേറ്ററി കമ്മിറ്റിയിറക്കിയ ഉത്തരവിനെ ചോദ്യം ചെയ്ത് പാലക്കാട് കരുണ മെഡിക്കല്‍ കോളജ്, ഗോകുലം മെഡിക്കല്‍ കോളജ്, ബിലീവേഴ്‌സ് ചര്‍ച്ച് മെഡിക്കല്‍ കോളജ് തുടങ്ങിയവര്‍ നല്‍കിയ ഹരജികളാണ് ഹൈക്കോടതി പരിഗണിക്കുന്നത്.
കോളജ് മാനേജ്‌മെന്റുകള്‍ നിശ്ചയിക്കുന്ന ഫീസ് അമിതമാണോ, ചൂഷണമുണ്ടോ എന്നിവ പരിശോധിക്കാനാണ് സമിതിക്ക് അധികാരമുള്ളതെന്നും എന്നാല്‍ പ്രവേശന - ഫീസ് നിശ്ചയിക്കുകയാണ് റെഗുലേറ്ററി കമ്മിറ്റി ചെയ്തതെന്നും ഹരജിക്കാര്‍ പറയുന്നു.
സ്വാശ്രയ മെഡിക്കല്‍ കോളജുകളിലെ എന്‍.ആര്‍.ഐ ഒഴികെയുള്ള സീറ്റുകളിലേക്ക് 11 ലക്ഷം രൂപയായി ഫീസ് ഉയര്‍ത്തണമെന്നും ചില കോളജുകള്‍ ആവശ്യപ്പെട്ടിട്ടുണ്ട്.