ദോഹ: എംബസികള്‍ എങ്ങിനെ പ്രവര്‍ത്തിക്കുന്നു എന്നതിന്റെ അടിസ്ഥാനത്തിലല്ല ലോകത്തിന് മുന്നില്‍ ഇന്ത്യയുടെ പ്രതിച്ഛായ സൃഷ്ടിക്കപ്പെടുന്നതെന്ന് പ്രധാനമന്ത്രി നരേന്ദ്രമോദി.ഓരോ രാജ്യത്തുമുളള ഇന്ത്യക്കാരെ അടിസ്ഥാനമാക്കിയാണെന്നതെന്നും അദ്ദേഹം കൂട്ടിച്ചേര്‍ത്തു. ഖത്തര്‍ സന്ദര്‍ശനത്തിനിടെ ദോഹ ഡൗണ്‍ ടൗണ്‍ പദ്ധതിയിലെ തൊഴിലാളികളുമായുള്ള സംഗമത്തില്‍ സംസാരിക്കുകയായിരുന്നു മോദി.അമേരിക്ക സന്ദര്‍ശിച്ചപ്പോള്‍ അവിടെയുള്ള ഇന്ത്യക്കാരെക്കുറിച്ചുള്ള മതിപ്പ് മനസിലാക്കാന്‍ കഴിഞ്ഞതായും മോദി സൂചിപ്പിച്ചു.

മാതൃരാജ്യത്ത് നിന്ന് ആരെങ്കിലും എത്തി വിശേഷങ്ങള്‍ പങ്കുവെക്കുന്നത് നിങ്ങള്‍ക്ക് സന്തോഷകരമാകുമെന്ന മുഖവുരയോടെയാണ് മോദി പ്രസംഗം തുടങ്ങിയത്. അത്തരത്തിലുള്ള സംസാരം കേള്‍ക്കുമ്പോള്‍ തന്നെ ഏകാന്തതയുടെ പകുതിയും ഇല്ലാതായി തീരുമെന്നും മോദി പറഞ്ഞു. ഖത്തറിലെ തൊഴിലാളികളുടെ ബുദ്ധിമുട്ടുകള്‍ തനിക്ക് മനസിലായെന്നും അധികൃതരെ കാണുമ്പോള്‍ അക്കാര്യം സംസാരിക്കുമെന്നും അവ പരിഹരിക്കാന്‍ പരമാവധി ശ്രമിക്കുമെന്നും മോദി പറഞ്ഞു. തൊഴില്‍ ചെയ്യാനുള്ള കഴിവാണ് ഇന്ത്യക്കാരെ വേറിട്ട് നിര്‍ത്തുന്നത്. അതിന് നിങ്ങളോട് രാജ്യം കടപ്പെട്ടിരിക്കുന്നു.
സ്ഥിരമായി തൊഴിലാളികളുടെ ആരോഗ്യം പരിശോധിക്കുന്ന ഡോക്ടര്‍മാരെ അഭിനന്ദിക്കാനും പ്രധാനമന്ത്രി മറന്നില്ല. ചടങ്ങില്‍ ഖത്തറിലെ ഇന്ത്യന്‍ സ്ഥാനപതി സഞ്ജീവ് അറോറ സ്വാഗതം പറഞ്ഞു.