വാഷിങ്ടണ്‍: യു.എസ് പ്രസിഡന്റ് ഡൊണാള്‍ഡ് ട്രംപിന്റെ മുഖ്യ അഭിഭാഷകനെതിരേ നീതിന്യായ വകുപ്പ് അന്വേഷണം പ്രഖ്യാപിച്ചു. മൈക്കല്‍ കോഹന്റെ ബിസിനസ് സംരംഭങ്ങളെ കുറിച്ചാണു സംഘം അന്വേഷിക്കുന്നത്. ഇതിന്റെ ഭാഗമായി അദ്ദേഹത്തിന്റെ വിവിധ ഓഫിസുകളില്‍ അന്വേഷണസംഘം റെയ്ഡ് നടത്തി.
നേരത്തെ തന്നെ കോഹന്റെ ബിസിനസ് ഇടപെടലുകളെ കുറിച്ച് അന്വേഷണം തുടങ്ങിയിരുന്നതായി ബന്ധപ്പെട്ട വൃത്തങ്ങള്‍ അറിയിച്ചു. കഴിഞ്ഞ തിങ്കളാഴ്ച കോഹന്റെ ഓഫിസുകളില്‍നിന്നു പിടിച്ചെടുത്ത രേഖകള്‍ പരിശോധിക്കുന്നതു തടയാന്‍ അദ്ദേഹത്തിന്റെ അഭിഭാഷകന്‍ ശ്രമിച്ചിരുന്നു. ഇതിനു പിറകെയാണ് ഔദ്യോഗികമായി നീതിന്യായ വകുപ്പ് അന്വേഷണം പ്രഖ്യാപിച്ചത്.
റെയ്ഡിനെ ട്രംപ് രൂക്ഷഭാഷയില്‍ വിമര്‍ശിച്ചു. സംഭവം അപമാനകരമാണെന്നും രാജ്യത്തിനു നേരെയുള്ള ആക്രമണമാണെന്നും ട്രംപ് ട്വീറ്റ് ചെയ്തു. തന്റെ ഓഫിസില്‍നിന്നു കണ്ടെടുത്ത തെളിവുകള്‍ പരിശോധിക്കുന്നത് അറ്റോര്‍ണിയുടെ കക്ഷിയെന്ന പ്രത്യേകാധികാരം വച്ചു തടയാന്‍ കോഹന്‍ ശ്രമിച്ചതായി പ്രോസിക്യൂട്ടര്‍ ടോം മക്കായ് ആരോപിച്ചു.