പെരുമ്പാവൂര്‍: നഗരമധ്യത്തില്‍ ഓടയില്‍ നിന്നും മനുഷ്യന്റെ തലയോട്ടി ലഭിച്ചു. പെരുമ്പാവൂര്‍ പി.പി റോഡില്‍ പഴയ ബീവറേജിന് സമീപത്ത് നിന്നും ഇന്നലെ രാവിലെ 6.30 ഓടെയാണ് തലയോട്ടി കണ്ടെത്തിയത്.
സമീപത്തെ വ്യാപാരി മഴവെള്ളം കെട്ടികിടക്കുന്നത് ഒഴുകി പോകുന്നതിനായി ഓടയില്‍ നിന്നും മാലിന്യങ്ങള്‍ നീക്കം ചെയ്യുന്നതിനിടെയാണ് തലയോട്ടി കണ്ടെത്തിയത്. തുടര്‍ന്ന് ഫോറന്‍സിക് വിദഗ്ധരുടെ പരിശോധനയില്‍ തലയോട്ടി മനുഷ്യന്റേത് തന്നെയാണെന്ന് തെളിഞ്ഞു.
പൊലിസ് സര്‍ജന്റെ നേതൃത്വത്തില്‍ പോസ്റ്റുമോര്‍ട്ടം നടത്തുന്നതിനായി തലയോട്ടി മുവാറ്റുപുഴ ജനറല്‍ ആശുപത്രിയിലേക്ക് മാറ്റിയിരിക്കുകയാണ്. സംഭവത്തില്‍ അന്വേഷണം ആരംഭിച്ചതായി പെരുമ്പാവൂര്‍ പൊലീസ് പറഞ്ഞു.