തൃക്കൈപ്പറ്റ: നമ്മുടെ പരിസ്ഥിതിയെ സംരക്ഷിക്കാതെ ഒരു രാഷ്ട്രീയ കക്ഷിക്കോ സാമുദായിക സംഘടനകള്‍ക്കോ മുന്നോട്ടുപോവാന്‍ ആവില്ലെന്ന് സി.കെ ശശീന്ദ്രന്‍ എം.എല്‍.എ അഭിപ്രായപ്പെട്ടു. ദക്ഷിണേന്ത്യന്‍ തണല്‍ നടുന്നവരുടെ കൂട്ടായ്മയുടെ ഉദ്ഘാടനത്തില്‍ സംസാരിക്കുകയായിരുന്നു അദ്ദേഹം.
 തൃക്കൈപ്പറ്റ യു.പി സ്‌കൂളില്‍ നടന്ന ചടങ്ങില്‍ മേപ്പാടി പഞ്ചായത്ത് പ്രസിഡന്റ് കെ.കെ സഹദ് അധ്യക്ഷനായി. ഗ്രാമങ്ങളുടെ ജൈവവൈവിദ്ധ്യവും വന്യജീവികളെയും മനുഷ്യനെയും സംയോജിപ്പിച്ച് കൊണ്ടുള്ള പരിസ്ഥിതി പ്രവര്‍ത്തനമാണ് നമുക്കാവശ്യമെന്നും അതിനായി ഈ വിഷയത്തിലെ വിദഗ്ദരുടെ അഭിപ്രായം ക്രോഡീകരിച്ച്‌കൊണ്ട് ഒരു മുന്നേറ്റം നടപ്പിലാക്കണമെന്നും അദ്ദേഹം കൂട്ടിച്ചേര്‍ത്തു.
ചടങ്ങില്‍ സംസാരിച്ച ജില്ലാ കലക്ടര്‍ കെ കേശവേന്ദ്രകുമാര്‍ പങ്കെടുത്തു. ഓരോ വ്യക്തിയും സ്വയം പരിസ്ഥിതിക്കായ് സമര്‍പ്പിക്കുകയാണെന്നും അത് ഇന്നത്തെ എല്ലാ പ്രശ്‌നങ്ങള്‍ക്കും മറുപടിയാകുമെന്നും അദ്ദേഹം അഭിപ്രായപ്പെട്ടു. ഈ പരിപാടിയില്‍ പങ്കെടുക്കാന്‍ വിവിധ സംസ്ഥാനങ്ങളില്‍ നിന്നും നൂറില്‍പരം  മരം നടുന്നവര്‍ ഒത്തുകൂടി അവരില്‍ മികച്ച പ്രവര്‍ത്തനം കാഴ്ച്ചവെച്ചവര്‍ക്ക് പൊന്നാടയും പ്രശസ്തിപത്രവും ഉപഹാരങ്ങളും നല്‍കി.
ഡി.എഫ്.ഒ ധനേഷ്‌കുമാര്‍, കര്‍ണാടകയില്‍ പ്രവര്‍ത്തിക്കുന്ന ചിത്രാ കൃഷ്ണന്‍,  യതീഷ്, പോണ്ടിച്ചേരിയിലെ കൃഷ്ണന്‍, ബാബുരാജ് ഉറവ്, തൃശ്ശൂര്‍ ജില്ലയിലെ ഡേവിസ് വളര്‍ക്കാവ്, തമിഴ്‌നാട് കടലൂരിലെ ആര്‍ പഞ്ചവര്‍ണന്‍ എന്നിവരെ ആദരിച്ചു.
അംഗങ്ങളായ ബിന്ദു പ്രതാപന്‍, ഉഷ ടീച്ചര്‍, സംഘാടക സമിതി ചെയര്‍മാന്‍ ചന്ദ്രശേഖരന്‍ തമ്പി, ആരണ്യ പോണ്ടിച്ചേരിയിലെ വികസനകാര്യ സ്റ്റാന്റിങ് കമ്മറ്റിയില്‍ നിന്നും ഡി ശരവണന്‍, വി കൃഷ്ണന്‍, ജോസ് മുണ്ടക്കുറ്റി, ഷജ്‌ന, എന്‍ ബാദുഷ, വിഷ്ണുനാഥ്  സംസാരിച്ചു.