കോട്ടയം: മഹാത്മാ ഗാന്ധി സര്‍വകലാശാല ജൈവസുസ്ഥിര കൃഷി കേന്ദ്രത്തിന്റെ ആഭിമുഖ്യത്തില്‍ നടത്തുന്ന ആഗോള ജൈവ സംഗമത്തിന്റെ ഭാഗമായി കാര്‍ഷിക ചലച്ചിത്രമേളയ്ക്ക് തുടക്കമായി. സി.എം.എസ് കോളജ് സെമിനാര്‍ ഹാളില്‍ നടന്ന ചലച്ചിത്രമേളയില്‍ അവതരണ ചലച്ചിത്ര പ്രകാശനം നടന്‍ പ്രേം പ്രകാശ് നിര്‍വഹിച്ചു. എം.ജി സര്‍വകലാശാല പ്രോ വൈസ് ചാന്‍സിലര്‍ പ്രൊഫ. സാബു തോമസ് അധ്യക്ഷനായി. സംവിധായകന്‍ എബ്രിഡ് ഷൈന്‍ ചലച്ചിത്ര മേളയുടെ ഉദ്ഘാടനം നിര്‍വഹിച്ചു. സിന്‍ഡിക്കേറ്റ് അംഗം ഡോ. എം.എസ് മുരളി, ജൈവം പ്രോഗ്രാം കോഡിനേറ്റര്‍ ജി. ശ്രീകുമാര്‍ സംസാരിച്ചു. അരവിന്ദന്‍ സംവിധാനം ചെയ്ത കാഞ്ചന സീതയാണ് ഉദ്ഘാടന ചിത്രമായി പ്രദര്‍ശിപ്പിച്ചത്. 10 ഫീച്ചര്‍ ഫിലിമുകളും 30 ഡോക്യുമെന്ററി ചലച്ചിത്രങ്ങളുമാണ് മേളയില്‍ പ്രദര്‍ശിപ്പിക്കുക. ജൈവ സംഗമത്തോടനുബന്ധിച്ച് പരിസ്ഥിതി സംരക്ഷണത്തിനായുള്ള ഒപ്പ് ശേഖരണവും നടന്നു. ആഗോള ജൈവ സംഗമത്തിന് ഇന്ന് തുടക്കമാകും. ഏപ്രില്‍ 24ന് സമാപിക്കും.