എരുമേലി: അപകടത്തില്‍പ്പെട്ട വാഹനത്തില്‍ നിന്നും കഞ്ചാവ് കണ്ടെടുത്ത സംഭവത്തില്‍ മുഴുവന്‍ പ്രതികളെയും പിടികൂടാനാകാതെ പൊലിസ്.
എരുമേലി പ്രൈവറ്റ് ബസ് സ്റ്റാന്‍ഡിന് സമീപത്ത് പ്രവര്‍ത്തിക്കുന്ന ബിവറേജസ് ഔട്ട്‌ലെറ്റിലേക്ക് നിയന്ത്രണംവിട്ട വാഹനം ആഴ്ചകള്‍ക്ക് മുന്‍പാണ് ഇടിച്ചു കയറിയത്. പിന്നീട് പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ തെരച്ചിലില്‍ വാഹനത്തിനടിയില്‍ ഒളിപ്പിച്ച നിലയില്‍ മൂന്നര കിലോ കഞ്ചാവ് കണ്ടെടുത്തിരുന്നു.
അപകട സമയം വാഹനത്തില്‍ അഞ്ച് യുവാക്കള്‍ ഉണ്ടായിരുന്നുവെന്നാണ് പൊലിസ് നിഗമനം.
എന്നാല്‍ സംഭവം നടന്ന് ആഴ്ചകള്‍ കഴിഞ്ഞിട്ടും മറ്റു പ്രതികളെ പിടികൂടുവാന്‍ കഴിഞ്ഞിട്ടില്ല. അന്വേഷണ ഉദ്യോഗസ്ഥരുടെ അനാസ്ഥയാണ് മറ്റു പ്രതികളെ കണ്ടെത്താനാവാത്തതെന്ന് നാട്ടുകാര്‍ ആരോപിക്കുന്നു.