കൊടുങ്ങല്ലൂര്‍: അറേബ്യയും ഇന്ത്യയും തമ്മിലുള്ള ബന്ധത്തിന്റെ നാഴികകല്ലാണ് ചേരമാന്‍ ജുമാ മസ്ജിദെന്ന് സഊദി അംബാസിഡര്‍ സൗദ് മുഹമ്മദ് അല്‍സഫി പറഞ്ഞു. സ്വകാര്യ സന്ദര്‍ശനത്തിന്റെ ഭാഗമായി ചേരമാന്‍ ജുമാ മസ്ജിലെത്തിയതായിരുന്നു അദ്ദേഹം.
ഇന്നലെ ജുമാ നമസ്‌ക്കാരത്തില്‍ പങ്കെടുത്ത ശേഷം പൗരാണികതയുടെ അടയാളമായ മസ്ജിദിലെ വലിയ വിളക്കും നൂറ്റാണ്ടുകള്‍ പഴക്കമുള്ള പ്രസംഗപീഢവും അംബാസിഡറും സംഘവും നോക്കിക്കണ്ടു. തുടര്‍ന്നു ഇസ്‌ലാമിക പൈതൃക മൂസിയത്തിലും സന്ദര്‍ശനം നടത്തി.
ചേരമാന്‍ മഹല്ല് പ്രസിഡന്റ് ഡോ. പി.എ മുഹമ്മദ് സഈദ്, സെക്രട്ടറി എസ്.എ അബ്ദുള്‍ കയ്യും, ട്രഷറര്‍ എ.കെ.കെ നയന, അഡ്മിനിസ്‌ട്രേറ്റര്‍ ഇ.ബി ഫൈസല്‍, ഇമാം സൈഫുദീന്‍ അല്‍ ഖാസിമി, അസി. ഇമാം ഷാനവാസ് ഖാസിമി, കമ്മിറ്റി അംഗങ്ങളായ കെ.എ അബ്ദുള്‍ കരീം, അബ്ദുള്‍ റഹ്മാന്‍ ചേര്‍ന്നു അതിഥിയെ സ്വീകരിച്ചു.