തിരുവനന്തപുരം: വെട്ടുകാട് മിസ്റ്റിക്കല്‍ റോസ് കോണ്‍വെന്റില്‍ നിന്ന് 25000 രൂപ മോഷ്ടിച്ച കേസിലെ പ്രതികളെ വലിയതുറ പൊലിസ് അറസ്റ്റ് ചെയ്തു. ബാലനഗര്‍ കോളനിയില്‍ താമസക്കാരായ കണ്ണാംതുറ സ്വദേശി ബോംബ് ജിതിന്‍ എന്ന് വിളിക്കുന്ന ജിതിന്‍, അനൂപ് ആന്റണി എന്നിവരെയാണ് വലിയതുറ പൊലിസ് അറസ്റ്റ് ചെയ്തത്.
ഡിസംബര്‍ 28ന് പുലര്‍ച്ചെ കോണ്‍വെന്റിലെ ഗ്രില്‍ പൊളിച്ചു അകത്തു കടന്ന പ്രതികള്‍ മോഷണം നടത്താന്‍ ശ്രമിക്കവെ ശബ്ദംകേട്ടു കോണ്‍വെന്റിലെ പുതിയ ജീവനക്കാരി ഉണര്‍ന്നെങ്കിലും പ്രതികള്‍ കത്തി വീശി ഭീഷണിപ്പെടുത്തിയ ശേഷം അന്തേവാസികളുടെ ചെലവിനായി കരുതിയിരുന്ന 25000 രൂപയും വിലപിടിപ്പുള്ള ഒരു വാച്ചും ജീവനക്കാരിയുടെ കഴുത്തില്‍ അണിഞ്ഞിരുന്ന മാലയും കവര്‍ന്ന് രക്ഷപ്പെട്ടു. കൃത്യത്തിനു ശേഷം പാറശാല ഭാഗത്തു ഒളിവില്‍ കഴിഞ്ഞിരുന്ന പ്രതികളെ തിരുവനന്തപുരം സിറ്റി പൊലിസ് കമ്മിഷണറുടെ നിര്‍ദേശ പ്രകാരം ശംഖുമുഖം അസിസ്റ്റന്റ് കമ്മിഷണര്‍ ആര്‍. ഇളങ്കോ ഐ.പി.എസിന്റെ നേതൃത്വത്തില്‍ വലിയതുറ സ്റ്റേഷന്‍ ഹൗസ് ഓഫിസര്‍ ബിജോയ് .എസ്, സബ് ഇന്‍സ്‌പെക്ടര്‍മാരായ ആശിഷ് എസ്.വി, അശോകന്‍ നായര്‍, സിവില്‍ പൊലിസ് ഓഫിസര്‍മാരായ ബിനു, ജീത് കുമാര്‍, സാബു, അനീഷ് ചേര്‍ന്നാണ് അറസ്റ്റ് ചെയ്തത്. പ്രതികള്‍ തിരുവനന്തപുരം ജില്ലയിലെ വിവിധ പൊലിസ് സ്റ്റേഷനുകളിലെ നിരവധി കേസുകളില്‍ അകപ്പെട്ടവരാണ്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.