ന്യൂഡല്‍ഹി: സീറ്റ് പരീക്ഷാ ക്രമക്കേടിനെതിരെ പ്രതിഷേധം നടത്തുന്ന വിദ്യാര്‍ഥികള്‍ക്ക് പിന്‍തുണ പ്രഖ്യാപിച്ച് പ്രതിപക്ഷ എം.പിമാര്‍ സഞ്ചരിച്ച ബസ് ഒടുവില്‍ ഗാന്ധി സ്മൃതിയിലെത്തി. ബസ് പോലീസ് പല തവണകളായി തടയാന്‍ ശ്രമിച്ചിരുന്നു. എന്നാല്‍ അതിനെയെല്ലാം മറികടന്ന് പ്രതിഷേധവുമായി മുന്നോട്ടു പോകുകയായിരുന്നു. 100 പ്രവര്‍ത്തകരും എം.പിമാര്‍ക്ക് ഐക്യദാര്‍ഢ്യവുമായി സ്ഥലത്തെത്തി. ഗാന്ധി സ്മൃതിയിലെത്തിയ എം.പിമാര്‍ ആത്മഹത്യ ചെയ്ത വിദ്യാര്‍ഥികള്‍ക്കായി മെഴുകുതിരി കത്തിച്ച് അനുശോചിച്ചു.  

നേരത്തെ വിവിധ സ്ഥലങ്ങളില്‍ പൊലിസ് ബാരിക്കേഡ് വെച്ച് ബസ് തടഞ്ഞിരുന്നു. എം.പിമാരും പൊലിസും തമ്മില്‍ വിവിധയിടങ്ങളില്‍ ഉന്തും തള്ളുമുണ്ടായിരുന്നു. ഏറെ നേരത്തെ സംഘര്‍ഷത്തിന് ശേഷമാണ് എം.പിമാര്‍ക്ക് ഗാന്ധിസ്മൃതിയിലെത്താന്‍ സാധിച്ചത്. ഗാന്ധി സ്മൃതിയുടെ ഗേറ്റ് തള്ളിത്തുറന്നുകൊണ്ടാണ് പ്രവര്‍ത്തകര്‍ അകത്തേക്ക് കയറിയത്. 

രാജ്യത്തുള്ള വിദ്യാര്‍ഥികള്‍ക്ക് പിന്‍തുണ പ്രഖ്യാപിച്ച് കൊണ്ട് പോകുന്ന ഞങ്ങളെ ഒരാള്‍ക്കും തടയാന്‍ സാധിക്കില്ലെന്ന് രാഹുല്‍ ഗാന്ധി പ്രതികരിച്ചു. പൊലിസ് ഉദ്യോഗസ്ഥര്‍ തടഞ്ഞ ബസില്‍ വെച്ച് ചിത്രീകരിച്ച വീഡിയോയിലാണ് പ്രതികരണം. എക്‌സ് പ്ലാറ്റ്‌ഫോമിലാണ് വീഡിയോ പങ്കുവെച്ചത്. ഞങ്ങളെ തടഞ്ഞുവെച്ച് കേന്ദ്രസര്‍ക്കാര്‍ നാടകം കളിക്കുകയാണെന്നും വിദ്യാര്‍ഥികള്‍ തെരുവില്‍ അവകാശങ്ങള്‍ക്ക് വേണ്ടി പോരാടുമ്പോള്‍ അവരുടെ അവകാശങ്ങള്‍ക്ക് വേണ്ടി നിലയുറപ്പിക്കാനാണ് പ്രതിപക്ഷ എം.പിമാര്‍ ഉദ്ദേശിക്കുന്നതെന്നും രാഹുല്‍ഗാന്ധി പറഞ്ഞു.
 
 പാര്‍ലമെന്റിലെ പ്രതിഷേധത്തിന് പിന്നാലെ രാഹുല്‍ഗാന്ധി കോണ്‍ഗ്രസ് എം.പിമാരുടെ യോഗം വിളിച്ചിരുന്നു. സുനേരി ബാഗിലെ രാഹുല്‍ ഗാന്ധിയുടെ ഔദ്യോഗിക വസതിയിലാണ് യോഗം നടന്നത്. 
 യോഗത്തിന് ശേഷമാണ് തങ്ങള്‍ ഗാന്ധിസ്മൃതിയിലേക്ക് മാര്‍ച്ച് നടത്തുകയാണെന്ന് പ്രഖ്യാപിച്ചത്. ഇതിന് പിന്നാലെ രാഹുല്‍ഗാന്ധിയുടെ വസതിയുടെ ഇരുവശവുമുള്ള റോഡുകള്‍ പൊലിസ് അടച്ചിരുന്നു. റോഡിന് മുന്നില്‍ ബസും കുറുകെ ഇട്ട് പൊലിസ് തടഞ്ഞിരുന്നു.

 

rahul gandhi declared that nobody can stop them as they go to offer support to the country's students. he made this statement while their bus was blocked on the way to gandhi smriti to pay tribute to students who committed suicide following question paper leaks. the response was featured in a video filmed inside the bus after police officers stopped it, which was shared on the x platform