കല്ലമ്പലം: ചാവര്‍കോട് സി.എച്ച് മുഹമ്മദ് കോയ മെമ്മോറിയല്‍ കോളജിലെ ഒരു വിഭാഗം വിദ്യാര്‍ഥികള്‍ ക്രിസ്മസ് ആഘോഷവുമായി ബന്ധപ്പെട്ട് തീവ്രവാദ സംഘടനകളുടെ വേഷത്തില്‍ പ്രകടനം നടത്തിയ സംഭവത്തില്‍ പൊലുസ് അന്വേഷണം ഊര്‍ജിതപ്പെടുത്തി.
വിദ്യാര്‍ഥികള്‍ ഐ.എസ്, അല്‍ ഖൊയ്ദ ഭീകരവാദികളുടെ വേഷത്തില്‍ തുറന്ന ജീപ്പിലും ബൈക്കിലും പ്രകടനം നടത്തുന്ന ദൃശ്യങ്ങള്‍ ചില ചാനലുകള്‍ പുറത്തുവിട്ടതോടെയാണ് പൊലിസ് അന്വേഷണം ആരംഭിച്ചത്. കോളജിലെ ശുചിമുറികളിലും ഭീകരവാദ സംഘടനാനുകൂല ചുവരെഴുത്തും ബിന്‍ലാദന്റെ ചിത്രവും വിദ്യാര്‍ഥികള്‍ വരച്ചു വച്ചിട്ടുള്ളതായി ചാനല്‍ പുറത്തു വിട്ടിരുന്നു. വീഡിയോ ദൃശ്യങ്ങള്‍ ഫോറന്‍സിക് പരിശോധനയ്ക്ക് അയക്കുമെന്ന് പൊലിസ് പറഞ്ഞു.
കഴിഞ്ഞ മാര്‍ച്ച് 14ന് കോളജിലെ വാര്‍ഷികാഘോഷവുമായി ബന്ധപ്പെട്ട് വിദ്യാര്‍ഥികളുടെ ക്ഷണം സ്വീകരിച്ച് സിനിമാ നടന്‍ സലിം കുമാര്‍ കോളജിലെത്തിയപ്പോള്‍ ആഘോഷങ്ങളുടെ ഭാഗമായി കുട്ടികള്‍ പ്രത്യേകവേഷം ധരിച്ചു സ്വീകരിച്ചതാണെന്നും വിദ്യാര്‍ഥികളുടെ വെറും തമാശക്കളി മാത്രമാണിതെന്നുമാണ് മാനേജ്‌മെന്റ് പറയുന്നത്. അന്ന് കുട്ടികള്‍ പകര്‍ത്തിയ ദൃശ്യങ്ങളാണ് പുറത്തുവന്നിരിക്കുന്നതെന്ന് സംശയിക്കുന്നതായി അയിരൂര്‍ എസ്.ഐ സജീവ് പറഞ്ഞു.
ഭീകരവാദ പ്രവര്‍ത്തനങ്ങളില്‍ വിദ്യാര്‍ഥികള്‍ക്ക് പങ്കുണ്ടോയെന്ന കാര്യങ്ങള്‍ ഉയര്‍ന്ന പൊലിസ് ഉദ്യോഗസ്ഥരും, ഇന്റലിജന്‍സും, കേന്ദ്ര ഏജന്‍സിയും അന്വേഷിക്കുമെന്നും എസ്.ഐ പറഞ്ഞു. കോളജ് കുട്ടികളുടെ വെറും തമാശക്കളിയെ ഭീകരവാദമായി ചിത്രീകരിക്കുകയാണ് ദൃശ്യമാധ്യമങ്ങള്‍ ചെയ്യുന്നതെന്നും വാര്‍ത്ത അടിസ്ഥാനരഹിതമാണെന്നും വി. ജോയി എം.എല്‍.എ പറഞ്ഞു.