പുന്നയൂര്‍: പുന്നയൂര്‍ പഞ്ചായത്തില്‍ 7.69 കോടി രൂപയുടെ വിവിധ പദ്ധതികള്‍ക്ക് ജില്ലാ ആസൂത്രണ സമിതിയുടെ അംഗീകാരം.
പഞ്ചായത്തിലെ 2019-2020ലേക്കുള്ള മൊത്തം 132 പദ്ധതികള്‍ക്കാണ് അംഗീകാരം ലഭിച്ചത്. വാര്‍ഷിക ഗ്രാന്റായി 4.12 കോടിയും കേന്ദ്ര സംസ്ഥാന വിഹിതം, തനത് ഫണ്ട് വിവിധ ധനകാര്യ സ്ഥാപനങ്ങളില്‍ നിന്നുള്ള വായ്പ എം.പി.എം.എല്‍.എ തുടങ്ങിയവയില്‍ നിന്നുള്ള ഉള്‍പ്പെടുത്തിയാണ് പദ്ധതി തയാറാക്കിയത്.
ഡിസംബര്‍ പകുതി വാരം പിന്നിടുമ്പോള്‍ നടപ്പു സാമ്പത്തിക വര്‍ഷത്തില്‍ 60 ശതമാനം ചെലവഴിച്ച് പുന്നയൂര്‍ പഞ്ചായത്ത് ജില്ലയില്‍ 27-ാം സ്ഥാനത്തും സംസ്ഥാന തലത്തില്‍ 337-ാം സ്ഥാനത്തുമാണുള്ളതെന്ന് പ്രസിഡന്റ് ബുഷറ ഷംസുദ്ദീന്‍, വൈസ് പ്രസിഡന്റ് ഐ.പി. രാജേന്ദ്രന്‍, അംഗങ്ങളായ ആര്‍.പി ബഷീര്‍, അഷറഫ് മൂത്തേടത്ത് എന്നിവര്‍ അറിയിച്ചു.
ഭവന നിര്‍മാണത്തിന് 1.12 കോടിയും ചെലവിടും. ദേശീയ പാതയില്‍ നിന്ന് അകലാട് ബദര്‍ പള്ളി വഴി എടക്കര കുഴിങ്ങരയിലേക്കുള്ള റോഡില്‍ നിലവില്‍ ചീര്‍പ്പ് പാലമാണ്. ഇത് ദ്രവിച്ച് തകര്‍ച്ചയുടെ വക്കിലാണ്. പ്രദേശത്തെ പ്രതിനിധികൂടിയായ പഞ്ചായത്ത് പ്രസിഡന്റിന്റെ ശ്രമഫലമായാണ് കനോലി കനാലിനു കുറുകെ വാഹനങ്ങള്‍ കൂടി കടന്നുപോകാനുള്ള ചലിക്കും പാലം നിര്‍മിക്കുന്നത്.
പഞ്ചായത്തിന്റെ വിഹിതത്തിനൊപ്പം ജില്ല പഞ്ചായത്തും വിഹിതം വെക്കുമെന്നാണ് പ്രതീക്ഷ. പാലം വന്നാല്‍ ദേശീയപാതയിലൂടെ വരുന്ന വാഹനങ്ങള്‍ക്ക് മന്ദലാംകുന്ന് വരെയുള്ള ദൂരം ഒഴിവാക്കി നേരെ വടക്കേക്കാട് ഭാഗത്തേക്ക് എളുപ്പത്തിലെത്താനാകും.
സമഗ്ര പച്ചക്കറി പദ്ധതി, കുട്ടാടന്‍ പാടം വികസനം, മൃഗസംരക്ഷണമേഖലയില്‍ പശു,ആട്,മുട്ടകോഴി വിതരണം മത്സ്യത്തൊഴിലാളിയായികളുടെ കുട്ടികള്‍ക്ക് വിദ്യാഭ്യാസ സംരക്ഷണ പദ്ധതികള്‍ ബഡ്‌സ് സ്‌കൂള്‍ നവീകരണം, പകല്‍ വീട് അടിസ്ഥാനമൊരുക്കുക, ആധുനിക ക്രിമിറ്റോറിയം നിര്‍മാണം, പഞ്ചായത്ത് ഓഫിസിന് സ്ഥലം വാങ്ങാനും വിവിധ അങ്കണവാടികള്‍ക്ക് സ്ഥലം വാങ്ങുന്നത്തിനും ബിള്‍ഡിങ് നിര്‍മിക്കുന്നതിനും പദ്ധതികള്‍, സ്‌കൂളുകളില്‍ പ്രഭാത ഭക്ഷണം, ചെറുകിട കുടിവെള്ള പദ്ധതികള്‍, തുടങ്ങിയ പദ്ധതികളും തയാറാക്കിയിട്ടുണ്ടെന്ന് പ്രതിനിധികള്‍ അറിയിച്ചു.