റോം: ഇറ്റലിയിലെ ഉത്തര കൊറിയന്‍ സ്ഥാനപതിയെ കാണാതായി. ദക്ഷിണ കൊറിയ ചാരസംഘമാണു വാര്‍ത്ത പുറത്തുവിട്ടത്. മുതിര്‍ന്ന ഉ.കൊറിയന്‍ ഉദ്യോഗസ്ഥന്റെ മകന്‍ കൂടിയായ ജോ സോങ് ഗില്ലിനെയാണു കാണാതായത്. കൂറുമാറ്റത്തിന്റെ ഭാഗമായാണു തിരോധാനമെന്നാണു സൂചന. ജോ പടിഞ്ഞാറന്‍ രാജ്യങ്ങളിലൊന്നില്‍ അഭയംതേടിയതായുള്ള വാര്‍ത്തകള്‍ പ്രചരിച്ചതോടെയാണ് ഔദ്യോഗിക പ്രഖ്യാപനവുമായി ദ.കൊറിയന്‍ വൃത്തങ്ങള്‍ രംഗത്തെത്തിയത്.
ഒരു മാസം മുന്‍പ് തന്നെ ജോ റോമിലെ ഉ.കൊറിയന്‍ കാര്യാലയം വിട്ടിരുന്നതായി ദ.കൊറിയന്‍ എം.പിയായ കിം മിന്‍ കി വെളിപ്പെടുത്തി. കഴിഞ്ഞ നവംബറോടെ ജോയുടെ കാലാവധി തീര്‍ന്നിരുന്നു. എന്നാല്‍, നവംബര്‍ ആദ്യത്തില്‍ തന്നെ ഇദ്ദേഹം കാര്യാലയത്തില്‍നിന്നു രക്ഷപ്പെട്ടതായി കിം മിന്‍ പറഞ്ഞു. എന്നാല്‍, നവംബറിനുശേഷം ജോയുമായി തങ്ങള്‍ക്കു യാതൊരുവിധ ബന്ധവുമുണ്ടായില്ലെന്ന് ദ.കൊറിയയിലെ നാഷനല്‍ ഇന്റലിജന്‍സ് സര്‍വിസ് വ്യക്തമാക്കി.
ജോയുടെ കൂടെ അദ്ദേഹത്തിന്റെ ഭാര്യയുമുണ്ടെന്നാണു വിവരം. ഇവരെയും കാര്യാലയത്തില്‍നിന്നു കാണാതായിട്ടുണ്ട്. ഇരുവരും ഒരു സുരക്ഷിത സ്ഥാനത്ത് അഭയംപ്രാപിച്ചതായി പേരുവെളിപ്പെടുത്താത്ത നയതന്ത്ര സ്രോതസുകളെ ഉദ്ധരിച്ച് ദ.കൊറിയന്‍ മാധ്യമമായ 'ജോങ്ആങ് ഇല്‍ബോ' റിപ്പോര്‍ട്ട് ചെയ്തു. ജോ എവിടെയെങ്കിലും അഭയം തേടിയതായി വിവരം ലഭിച്ചിട്ടില്ലെന്ന് ഇറ്റാലിയന്‍ വിദേശകാര്യ മന്ത്രാലയം പ്രതികരിച്ചു. ഉ.കൊറിയ സ്ഥലംമാറ്റുന്നതായുള്ള വിവരമാണ് അവസാനമായി അദ്ദേഹത്തെ കുറിച്ചു കേട്ടതെന്നും മന്ത്രാലയം അറിയിച്ചു.
ഉ. കൊറിയന്‍ പൗരന്മാര്‍ ദ.കൊറിയയിലേക്കു കൂറുമാറുന്നതു പതിവുള്ളതാണെങ്കിലും ഉയര്‍ന്ന പദവിയിലുള്ള വ്യക്തികള്‍ ഇത്തരത്തിലുള്ള നീക്കം നടത്തുന്നത് അപൂര്‍വമാണ്. ഉ.കൊറിയയുടെ മുന്‍ ബ്രിട്ടീഷ് ഉപസ്ഥാനപതി തായ് യോങ് ഹോ ആണ് അവസാനമായി കൂറുമാറിയ ഉന്നതവൃത്തം. 2016ല്‍ കുടുംബസമേതം ദ.കൊറിയയിലാണ് ഹോ അഭയം തേടിയത്.