തിരുവനന്തപുരം: വിവാഹ വീട്ടില്‍നിന്നു മോഷണം പോയ സ്വര്‍ണം ദിവസങ്ങള്‍ക്കു ശേഷം വഴിയരികില്‍ ഉപേക്ഷിച്ച നിലയില്‍ കണ്ടെത്തി. കാട്ടാക്കട മാറനല്ലൂരിലാണ് സംഭവം. ഇന്നു രാവിലെയാണ് വീടിനു സമീപത്തെ വഴിയില്‍ പ്ലാസ്റ്റിക് കവറില്‍ പൊതിഞ്ഞ നിലയില്‍ 17.5 പവന്‍ സ്വര്‍ണം കണ്ടെത്തിയത്. പൊലിസ് അന്വേഷണം പുരോഗമിച്ചു കൊണ്ടിരിക്കവെയാണ് സ്വര്‍ണം ഉപേക്ഷിച്ചത്.

14നാണ് മാറനല്ലൂര്‍ പുന്നൂവൂരില്‍ ഗില്ലിന്‍ എന്നയാളുടെ വീട്ടില്‍ വിവാഹത്തിനിടെ മോഷണം നടന്നത്. ഗില്ലും ഭാര്യയും വിവാഹശേഷം ബന്ധുവീട്ടില്‍ വിരുന്നിനു പോയ ശേഷം രാത്രി തിരിച്ചെത്തിയപ്പോഴാണ് സ്വര്‍ണം നഷ്ടപ്പെട്ട വിവരം അറിയുന്നത്. ഗില്ലിന്റെ ഭാര്യയുടെ 30 പവന്‍ സ്വര്‍ണം വച്ചിരുന്ന ബാഗില്‍നിന്ന് 17.5 പവന്‍ ആണ് നഷ്ടപ്പെട്ടത്.

തുടര്‍ന്ന് വീട്ടുകാര്‍ പൊലിസില്‍ പരാതി നല്‍കിയതിനെ തുടര്‍ന്ന് പൊലിസ് എത്തി സംശയമുള്ളവരെ ചോദ്യം ചെയ്യുകയും വിരലടയാളം ഉള്‍പ്പെടെ പരിശോധിക്കുകയും ചെയ്തു. ഇതിനു പിറകെയാണ് സ്വര്‍ണം ഉപേക്ഷിച്ചത്. പിടിക്കപ്പെടും എന്ന് ഉറപ്പായതോടെ സ്വര്‍ണം തിരികെ വയ്ക്കുകയായിരുന്നുവെന്നാണ് മാറനല്ലൂര്‍ പൊലിസ് വ്യക്തമാക്കുന്നത്.

A daring daylight theft at a wedding venue takes an unexpected turn as the thief flees, leaving behind 17.5 sovereigns of stolen gold. Police probe ongoing to identify the suspect.