കൊല്ലം: എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശനെയും വൈസ് പ്രസിഡന്റും മകനുമായ തുഷാര്‍ വെള്ളാപ്പള്ളിയെയും പ്രതിരോധത്തിലാക്കി എസ്.എന്‍.ഡി.പി യോഗം ആസ്ഥാനമായ കൊല്ലത്ത് വെള്ളാപ്പള്ളി വിരുദ്ധരുടെ വിമോചന പ്രഖ്യാപന കണ്‍വന്‍ഷന്‍ ചേര്‍ന്നു.
കാസര്‍കോട് ഒഴികെയുള്ള ജില്ലകളില്‍നിന്നായി ആയിരത്തിലധികം പ്രതിനിധികള്‍ കൊല്ലം സി. കേശവന്‍ സ്മാരക ടൗണ്‍ഹാളില്‍ ഒത്തുകൂടി. പ്രമുഖ സാഹിത്യകാരന്‍ പ്രൊഫ. എം.കെ സാനു യോഗം ഉദ്ഘാടനം ചെയ്തു. സുഭാഷ് വാസു വെള്ളാപ്പള്ളിക്കെതിരേ ഉന്നയിച്ച കൊലപാകത ആരോപണങ്ങള്‍ സര്‍ക്കാര്‍ അന്വേഷിക്കണമെന്ന് കണ്‍വന്‍ഷന്‍ ആവശ്യപ്പെട്ടു.
ആരോപണങ്ങള്‍ക്ക് വ്യക്തമായ തെളിവുകളുണ്ടെന്നും സുഭാഷ് വാസുവിനെതിരേ ശക്തമായ മറുപടിയുമായി വെള്ളാപ്പള്ളിയും മകനും രംഗത്തു വരാത്തതും മധ്യസ്ഥര്‍ വഴി സുഭാഷ് വാസുവുമായിട്ടുള്ള പ്രശ്‌നങ്ങള്‍ ഒതുക്കിത്തീര്‍ക്കാനുള്ള നീക്കവും ഇരുവരും പ്രതിരോധത്തിലായതിനെ തുടര്‍ന്നാണെന്ന് എസ്.എന്‍.ഡി.പിയോഗം സംരക്ഷണ സമിതി ഭാരവാഹികള്‍ പറഞ്ഞു.
ആലുവാപ്പുഴയില്‍ സ്വാമി ശാശ്വതീകാനന്ദയുടെ ദുരൂഹമരണവും കോട്ടയം, ചെന്നെ എന്നിവടങ്ങളിലെ രണ്ടു മരണങ്ങളുമാണ് സുഭാഷ് വാസുവിന്റെ ആരോപണത്തിന് പിന്നിലെന്നാണ് അദ്ദേഹവുമായി അടുപ്പമുള്ള കേന്ദ്രങ്ങളില്‍നിന്ന് അറിയുന്നത്. നിലവിലെ സര്‍ക്കാരില്‍നിന്ന് അന്വേഷണം സംബന്ധിച്ച അനുകൂലമായ നടപടികള്‍ ഉണ്ടാകില്ലെന്ന വിശ്വാസത്തിലാണ് വെള്ളാപ്പള്ളി വിരുദ്ധര്‍.
ഇതിനിടെ, എസ്.എന്‍.ഡി.പി യോഗം ബൈലാ ഭേദഗതി സര്‍ക്കാരിനെ അറിയിക്കാതെ നടത്തിയതു സംബന്ധിച്ച് എസ്.എന്‍.ഡി.പി യോഗം സംരക്ഷണസമിതി നല്‍കിയ കേസില്‍ കൊല്ലത്തെ കോടതിയില്‍ ഈ മാസം മധ്യത്തോടെ അന്തിമവാദം നടക്കും. മൂന്നുവര്‍ഷം കാലാവധിയുള്ള യോഗം ഭരണസമിതി അഞ്ചുവര്‍ഷമാക്കിയത് നിയമവിരുദ്ധമായാണെന്നാണ് കേസ്.