കൊപ്പം: നവോത്ഥാന കേരളത്തിനായ് പുരോഗമന യുവത്വം എന്ന മുദ്രവാക്യമുയര്‍ത്തി എ.ഐ.വൈ. എഫിന്റെ നേതൃത്വത്തില്‍ വൈക്കത്തുനിന്നും കോഴിക്കോട്‌നിന്നും നവോത്ഥാന സംരക്ഷണ ജാഥകള്‍ ആരംഭിച്ചു. വൈക്കത്തുനിന്ന് ആരംഭിച്ച സംസ്ഥാന പ്രസിഡന്റ് ആര്‍. സജിലാല്‍ ജാഥാ ക്യാപ്റ്റനായുള്ള തെക്കന്‍ മേഖലാജാഥ സി.പി.ഐ ദേശീയ എക്‌സിക്യൂട്ടീവ് മെംബര്‍ പന്ന്യന്‍ രവീന്ദ്രന്‍ ഉദ്ഘാടനം ചെയ്തു. സംസ്ഥാന സെക്രട്ടറി മഹേഷ് കക്കത്ത് നയിക്കുന്ന വടക്കന്‍ മേഖലാജാഥ അഖിലേന്ത്യാ ജനറല്‍ സെക്രട്ടറി ആര്‍. തിരുമലൈ ഉദ്ഘാടനം ചെയ്തു. രണ്ട് ജാഥകളും ജനുവരി ആറിന് തൃശ്ശൂരില്‍ സമാപിക്കും.
ഇന്ന് പാലക്കാട് ജില്ലയിലേക്ക് പ്രവേശിക്കുന്ന വടക്കന്‍ മേഖലാജാഥക്ക് കൊപ്പത്തും പട്ടാമ്പിയിലും സ്വീകരണം നല്‍കും. കൊപ്പത്ത് വൈകിട്ട് മൂന്നിന് വനംവകുപ്പ് മന്ത്രി കെ. രാജുവും, പട്ടാമ്പിയില്‍ അഞ്ചിന് റവന്യൂ മന്ത്രി ഇ. ചന്ദ്രശേഖരനും ജാഥാ സ്വീകരണ പൊതുയോഗങ്ങള്‍ ഉദ്ഘാടനം ചെയ്യും. സി.പി.ഐ ജില്ലാ സെക്രട്ടറി കെ.പി സുരേഷ് രാജ്, മുഹമ്മദ് മുഹ്‌സിന്‍ എം.എല്‍.എ, പ്രൊഫ. പി.എ വാസുദേവന്‍, വി.ടി വാസുദേവന്‍ മാസ്റ്റര്‍, വിജയന്‍ കുനിശ്ശേരി, വി. ചാമുണ്ണി, ജോസ് ബേബി, കെ. മല്ലിക, ഒ.കെ സൈതലവി പങ്കെടുക്കും.