മട്ടാഞ്ചേരി: നഗരസഭ അടച്ച് പൂട്ടിയ മട്ടാഞ്ചേരി ബസ് സ്റ്റാന്റിലെ ശുചിമുറി വീണ്ടും തുറന്ന് പ്രവര്‍ത്തനമാരംഭിച്ചു.നേരത്തേ നടത്തിയ കരാറുകാരന് തന്നെ താല്‍ക്കാലികമായി ശുചിമുറി നടത്തിപ്പിന് അനുവാദം നല്‍കുകയായിരുന്നു.
കരാര്‍ കാലാവധി കഴിഞ്ഞതിനെ തുടര്‍ന്നാണ് നഗരസഭ ശുചിമുറി അടച്ച് പൂട്ടിയത്. എന്നാല്‍ പകരം സംവിധാനം ഒരുക്കാതെ ശുചിമുറി അടച്ചതോടെ ഇവിടെയെത്തുന്ന നൂറ് കണക്കിനാളുകള്‍ ദുരിതത്തിലായി.
ഈ ഭാഗത്ത് ആകെയുള്ള ശുചിമുറിയാണ് അടച്ചത്. മട്ടാഞ്ചേരി ബോട്ട് ജെട്ടിയില്‍ ഒരു ശുചിമുറിയുണ്ടെങ്കിലും ഇത് പ്രവര്‍ത്തിക്കുന്നില്ല. ആകെയുള്ള ശുചിമുറി കൂടി അടച്ചതോടെ ഇവിടെയെത്തുന്ന വിദേശ വിനോദ സഞ്ചാരികള്‍ ഉള്‍പ്പെടെ വലയുന്നതായി മാധ്യമങ്ങളില്‍ റിപ്പോര്‍ട്ട് വന്നതോടെയാണ് നഗരസഭ താല്‍ക്കാലികമായി തുറന്ന് പ്രവര്‍ത്തിപ്പിക്കാന്‍ തീരുമാനിച്ചത്.