കണ്ണൂര്‍: കണ്ണൂര്‍ നഗരത്തിലെ ഗതാഗതകുരുക്കിനു പരിഹാരം കാണാന്‍ ആവിഷ്‌കരിച്ച കണ്ണൂര്‍ ബൈപാസ് പദ്ധതിയുടെ പ്രവൃത്തി പാതിവഴിയില്‍ നിലച്ചു.
അവസാനഘട്ടമായി ജെ.ടി.എസ് മുതല്‍ കുറുവ പാലം വരെയുള്ള റോഡ് വീതി കൂട്ടി ടാര്‍ ചെയ്യുന്ന പ്രവൃത്തിയാണ് അധികൃതരുടെ അനാസ്ഥ കാരണം കരാറുകാര്‍ നിര്‍ത്തി വെച്ചത്. പ്രധാനമായി കെ.എസ്.ഇ.ബിയുടെ പോസ്റ്റുകള്‍ മാറ്റാത്തതാണ് പ്രവൃത്തി മുടങ്ങാന്‍ കാരണം. ടാര്‍ ചെയ്യാനുള്ള വീതി നിലവില്‍ റോഡിനുണ്ടെങ്കിലും റോഡിലെ പോസ്റ്റുകള്‍ മാറ്റാതെ ടാറിങ് അനുവദിക്കില്ലെന്ന നിലപാടിലാണ് നാട്ടുകാര്‍. കെ.എസ്.ഇ.ബിയില്‍ പണം കെട്ടിവെച്ച് നാളേറെയായിട്ടും കെ.എസ്.ഇ.ബി അധികൃതര്‍ നടപടിയും സ്വീകരിക്കുന്നില്ല.
ഇതേ ഭാഗത്ത് ചില കെട്ടിടങ്ങള്‍ കൂടി പൊളിച്ചു മാറ്റാനുമുണ്ട്. കെട്ടിടങ്ങളും മതിലുകളും പൊളിച്ചു നീക്കുന്നതുമായി ബന്ധപ്പെട്ടും ചിലര്‍ അനാവശ്യതടസങ്ങള്‍ സൃഷ്ടിക്കുകയാണെന്ന ആരോപണവുമുണ്ട്. എ.പി അബ്ദുല്ലക്കുട്ടി എം.എല്‍.എ ആയിരിക്കേ അനുമതി നേടി പ്രവൃത്തിയാരംഭിച്ച പദ്ധതിയാണ് അവസാനഘട്ടത്തില്‍ മുടങ്ങിയിരിക്കുന്നത്.
പുതിയതെരു സ്‌റ്റൈലോ കോര്‍ണര്‍ മുതല്‍ താഴെ ചൊവ്വ വരേയുള്ള പ്രവൃത്തിയും പുതിയതെരു ഹൈവേ ജങ്ഷന്‍ മുതല്‍ കണ്ണൂര്‍ സിറ്റി വരെയുള്ള പ്രവൃത്തിയും കഴിഞ്ഞ വര്‍ഷം തന്നെ പൂര്‍ത്തിയായിരുന്നു. 2016 ജനുവരിയിലാണ് 15 കോടി രൂപ ചെലവില്‍ കണ്ണൂര്‍ ബൈപാസ് നിര്‍മാണ പ്രവൃത്തി ആരംഭിച്ചത്.