പൂച്ചാക്കല്‍: പാവപ്പെട്ടവര്‍ക്ക് വീട് നിര്‍മിക്കാന്‍ സൗജന്യമായി കട്ടകള്‍ നിര്‍മിച്ചു നല്‍കുന്നതിന് വനിതകള്‍ രംഗത്ത്. ചേന്നംപള്ളിപ്പുറം ഗ്രാമപഞ്ചായത്തിലെ നാല്‍പതോളം വരുന്ന കുടുംബശ്രീ പ്രവര്‍ത്തകരാണ് കോണ്‍ക്രീറ്റ് കട്ടകള്‍ (ഹോളോബ്രിക്‌സ്)നിര്‍മിച്ചു നല്‍കുന്നത്.
ഗ്രാമപഞ്ചായത്തില്‍ ലൈഫ് മിഷന്‍ പദ്ധതിയില്‍ വീട് നിര്‍മിക്കുന്നവര്‍ക്ക് തൊഴിലുറപ്പു പദ്ധതിയില്‍പ്പെടുത്തിയാണ് സൗജന്യ കോണ്‍ക്രീറ്റ് കട്ടകള്‍ തയാറാക്കി നല്‍കുന്നത്. കുടുംബശ്രീയും തൊഴിലുറപ്പുപദ്ധതിയും ലൈഫ് പദ്ധതിയില്‍ കണ്ണിചേര്‍ന്നാണ് ചേന്നം പള്ളിപ്പുറത്തെ 289 കുടുംബങ്ങള്‍ക്ക് ലൈഫ് മിഷന്‍ പദ്ധതിയില്‍ വീട് നിര്‍മിക്കുന്നത്.ഒരു വീടിന് 500 കോണ്‍ക്രീറ്റ് കട്ടകള്‍ വീതം സൗജന്യമായി തൊഴിലുറപ്പ് തൊഴിലാളികള്‍ നിര്‍മിച്ചു നല്‍കുമെന്ന് പഞ്ചായത്ത് പ്രസിഡന്റ് പി.ആര്‍ ഹരിക്കുട്ടന്‍ പറഞ്ഞു. കട്ട നിര്‍മാണത്തിനായി രണ്ട് യൂണിറ്റുകളാണ് തയ്യാറാക്കിയിട്ടുള്ളത്. നിര്‍മ്മാണത്തിന് ആവശ്യമായ അസംസ്‌കൃത വസ്തുക്കള്‍ പഞ്ചായത്ത് ടെന്‍ഡര്‍ നല്‍കിയാണ് വാങ്ങിയത്. യന്ത്രങ്ങള്‍ വാടകയ്ക്ക് എടുത്താണ് ഉപയോഗിക്കുന്നത്. രണ്ട് സ്ഥലങ്ങളിലായി 40 തൊഴിലുറപ്പ് തൊഴിലാളികളെയും രണ്ട് വിദഗ്ധ തൊഴിലാളികളെയും ഉള്‍പ്പെടുത്തിയാണ് ജോലികള്‍ നടക്കുന്നത്. വാര്‍ഡ് മെംബര്‍ കെ.എസ് ബാബു, കുടുംബശ്രീ പ്രവര്‍ത്തക എ.കെ മല്ലിക ദാസന്‍ സംസാരിച്ചു.